اخيرا كسبت فى الطاولة

امبارح اول يوم اكسب فى الطاولة , مش عارف احمد كان شارب حاجة ولا اية عشان كدة خسر ولا انا اللى كنت محترف بزيادة عشان كدة كسبت 

المهم انى كسبت وخلاص , بس فعلا احساس رائع انك تكسب فى الطاولة بالذات لانها لعبة بتعتمد على النفس الطويل لان الفورة من 30 وهذا ماياقودك اننا ممكن نفضل لحد الفجر بنلعب فى ( عشرة واحدة ) , المهم انا وهايبر اصلا كنا بنكمل عشرة قديمة ماكناش لاحقنا نكملها فى ايوم اللى قبلة , بس انا لاحظت حاجة غريبة لما بلعب جوة القهوة بكسب لكن لو طلعت العب فى الهوا لازم اخسر ومش عارف السبب 

يمكن عشان ريحة القهوة من جوة دافية ولا عشان ريحة المعسل التفاح اللى بتجننى من كتر حلاوتها

كلو كوم وكوباية حمص الشام كوم تانى , اشهد ان ابو ادهم واحد من افضل خمس اشخاص شربت منهم حمص الشام , فعلا كوباية حمص تقدر تقول عليها كوباية حمص مظبوطة , مش حراقة اوى ومش باردة اوى ومش سخنة اوى كل حاجة فيها فى المعقول لدرجة انك ممكن تشرب خمسة حمص ورا بعض من غير ماتحس بحاجة اصلا 

اما الصديق هايبر , فا مش بخلص من تريقتة على كل لعبة انا بلعبها , شوية يقولى خلص انت بطئ كدة لية ؟؟ ومرة يقولى انت كوفتجى وحظك فى الزهر عالى وماشية معاك وشوية يقولى انت اصلا عويل وانا هاظبطك , المهم انى مش بخلص من تريقتة بس انا بحبة وبحب تريقتة جدا وبحب صحبتة جدا جدا