السبت، 11 مايو، 2013

الهروب علينا حق


اول كلامى السلام عليكم , السلام عليكم , السلام عليكم 
حاولو تحسوا بعظمه الكلمه , السلام !!! والسلام عليكم كلكم مش على بعضكو او الحلويين منكو بس , السلام على الاخيار لخيرهم والسلام على الاشرار لتجنب شرهم 

وكعادتى فى بدايه كل بوست ببقى مش عارف اقول زى اللى رايح يقابل حبيبته لأول مره !!! موقف مش ظريف بس بيعيش فى الذاكره لوقت طويل و ده سبب حبى الابدى لكل البدايات اللى ربنا خلقها رغم رخامتها وصعوبتها الا ان ليها متعتها الخاصه 

فى الفتره الاخيره حاسس ان فى حاجه غلط بتحصل فى حياتى , الوقت بقى بيعدى بسرعه لما اعدها من قبل , وكأن فى حد بيجرى وبيسحب حياتى وراه والغريب والمنافى لكل قوانين الطبيعه ان بعد فتره من الجرى لازم يتعب ويهدى و رتم حياتى يهدا شويه لكن الغريب ان اصبح اسرع و اعنف للدرجه الكافيه اللى تخلينى اسئل نفسى كل يوم لما اصحى من النوم 

هو انا النهارده ولا امبارح؟؟

طاحونه ضخمه بتطحن الوقت والمجهود والمشاكل و العلاقات الفاشل منها والناجح و بتخرجلى بمزيج جديد اكبر حجما و اكثر تعقيدا و انا الثابت الوحيد فى كل الامور 

كل حاجه تدعو للهروب لجبال البحر الاحمر حيث اصوات طيور النورس تملئ الفراغ , ارتطام الموج بالصخور كافى لمحو كل ذنوبى و حماقاتى بل انه كافى لمحوى انا شخصيا ,,, و  فى مقوله اخرى لصديق عزيز ان جبال سانت كاترين هتنضف بقايا اخر عشرين سنه فى حياتك...

المعادى شارع 106 , الدور الرابع , البلكونه , لسه مش عارف استوعب فكره انى هاسيب البلكونه دى واروح مكان تانى فيه بلكونه تانيه حتى لو كانت بلكونه اكثر اتساعا واكثر رفاهيه و بتطل على النيل عدل 

الحكايه مش حاكيه نيل و رفاهيه وبتاع !! القصه فى القصه , اول ماجيت الشقه دى ماكنتش حابب البلكونه دى خالص وكنت بحب البلكونه اللى اوضتى اكتر و كنت ماليها زرع و عامل منها ملاز ليا لكن بعد فتره الامور اختلفت والسبب كان انه فى ليله من ليالى الشتاء القارس , الدنيا مطرت و ساعتها كانت حفله سعاد ماسى بتتذاع على رادو ترام و مج النسكافيه كان بيضارع انه يفضل سُخن فى الليله دى لاقتنى اخدت المج وخرجت البلكونه وكانت اول مره اشوفها جميله كدا !!! صوت المطر و هو بيضرب ورق الشجر مع الهوا وهو بيهز فروع الشجر , و مع اخر انفاس البخار اللى خرجت من المج وهو بيعلن انه خلاص بقى بارد لاقتنى بضحك لوحدى ومن دون ابداء اى اسباب و اكملت سعاد ماسى , احكى ياراوى و من هنا وقعت فى حب البلكونه وفضلت فى الليله دى قاعد فى البلكونه لحد الصبح رغم ان الجو كان سقعه جدا وانى اخدت برد كمان الا انه كان اجمل دور برد فى حياتى كلها 

امى مؤخرا قررت اننا نخرج على كورنيش المعادى عشان هى بتحب منظر النيل !! طب انا مالى ؟؟ انا بحب منظر النيل جدا لكن الطقوس اللى حصلت و خلتنى احب البلكونه هنا مش هاتتكرر تانى لان لسبب بسيط مستحيل هايحصل تزامن انهم يذيعوا حفله سعاد ماسى والدنيا بتشتي تانى !!!!!!! 

غير ان انا متعلق جدا بشارع 106 !! اسمو حلو كدا وتحس انه متناسق ورشيق , الشارع بحسه شبهى جدا !! الناس اللى ساكنين فيه ارستقراطين واشباه ارستقراطين و انا واحد منهم !! هما شبهى وانا شبهم , مش بحسنى غريب وانا ماشى هناك او و انا نازل اجرى الصبح و اقابل الست اللى بتنزل تتمشى الصبح هى والكلب بتاعها  وكل يوم اصبح عليها وهى تصبح عليا و احنا اساسا مانعرفش بعض لكن رابط 106 جمع بينا , ده انا من كتر حبى فى الشارع قررت انى اسمى اول روايه ليا " شارع 106 " و كانت هتبيع كتير فشخ فى المعادى !! D: لان الناس كانت هتفتكرو دليل او خريطه لان ما اعتقدش انه فى قاهرى ماتهش قبل كدا فى المعادى !!!

بس يالا اهو حكم القوى !! هاروح البيت الجديد !! امى بتقول انه احلى من البيت اللى احنا فيه و الناس اللى ساكنين هناك معظمهك من رجال الاعمال الكبار وسيدات الروتارى !! انا مش شبه الناس دول !! انا واحد اول مابيجوع وهو فى الشارع اول حاجه بتيجى فى باله " هو فين اقرب عربيه فول ؟؟!! " و فى خلال سفرى بره مصر كانت اكتر حاجه بتزعلنى انى مش بلاقى عربيات الفول فى كل شارع مصرى اصيل و كوبايه الشاى الحقيره و مع هذا بتكيفنى !! 

مشكلتى مع الناس اللى المجتمع بيطلق عليهم لفظ ال peak انهم ما بعيرفوش يتعاملوا مع حد هو مش منهم او عاش فى وسطهم , عشان كدا ليهم اماكنهم اللى ماحدش بيروحها غيرهم , بيتجوزوا من بعض دايما , البيزنس بتاعهم كله مرتبط ببعضه , كلهم عارفين تاريخ بعض !! انا مش الناس دول !! جايز بحكم شغلى بحتك بيهم كتير لكن رغم هذا حاولت بكل قوتى انى افضل بقايا الارستقراطى 

اما عن بقايا ارستقراطى فيرجع تاريخ العائله !! الى ان جدى الاكبر رزق باشا الجمال !! كان من اعيان شبرا مصر , تقول الاسطوره , ان أل الجمال كانوا بيملكوا نص شبرا تقريبا ايام ماكنت لسه معظمها اراضى زراعيه ومع وصول عبد الناصر و قوانين الاصلاح الزراعى اللى يادوب سابت لجدى البيت اللى فضل عايش فيه لحد ما مات من الحسره !! ولهذا السبب ان ابويا و كل اعمامى بيكرهو عبد الناصر رغم ان اغلبهم لم يعاصره !! ابن عمى دايما يقولى " لولا عبد الناصر كان زمانا بنجرى ورا العيال بالكرباج دلوقتى " D:

مش عارف ان ايه اللى بيخلينى احكى كل الرغى ده , بس اهى طاقة زياده و لازم تخرج بقى ! و المشكله اللى بقيت بواجهها مؤخرا انى مابقتش عارف اتكلم براحتى خالص , فى كل مكان هتلاقى ناس تعرفك و مش هتاخد راحتك فى الكلام , تويتر , فيس بوك , لينكد , يمكن هنا هو اقل عدد ناس تعرفنى شخصيا , عشان كدا بحكى براحتى سيكا , فمتعه الحكى للأغراب مالهاش مثيل 

 و اخيرا ! انا محتاج اجازه طويله من غير موبايل و من غير انترنت , ومن غير اى تكنولوجيا , هو راديو صغير و شويه كتير كتير و سجاير ميريت , او LM احمر على حسب الحاله الماديه بقى , و بس , و الله هابقى كويس بعد اجازة زى دى بس هى فين , ده مش عارف هاعمل ايه فى البلاوى اللى ورايا , شغلى و شغل ابويا و مشاكلى الشخصيه , و امتحاناتى و الخ الخ 

كان الله فى عونى بقى 

والى اللقاء فى حفله اخرى من حفلات الفضفضه اللى من غير حساب