الحب و الغضب والخوف والالم و الصبر والعزيمة والاصرار والاحتياج والارتواء و المعاناة والوصول والفشل والانهيار والضياع
اية دة ؟؟؟ اية دة بجد , انا وصلت لمرحلة انى حسيت بالثمل و عيناى مش راضية تتحرك من على الشاشة حتى بعد ما خلص الفيلم , ازاى هى قدرت توصل للكم دة من الابداع المتواصل اللى مايخليش اى بنى ادم يفصل منها ولو للحظة
طب خدت اد اية عشان تشرب الدور كدة ؟؟ طب حالتها النفسية كانت اية بعد ما الدور خلص ولقت نفسها المفروض ترجع بشرية تانى ؟؟ طب هل عرفت ترجع ؟؟ طب هل عرفت تقتنع انها بشر بجد مش بجعة ؟؟
اتقان منقطع النظير
كنت افضل اشوف الفيلم دة صامت مافيهوش كلام فقط المزيكا وحركات الاشخاص زى ماكان فى اوبرا للا انة فى الاوبرا ماوصلنيش الاحساس زى ما شوفتة فى الفيلم ماحستش بالمعاناة زى ماحسيت بيها فى الفيلم , ما اتوجعتش زى ما اتوجعت جوة الفيلم
اد اية كانت شريرة و اد اية كانت هشة وضعيفة و قد اية كانت قوية وعنيدة ؟؟ مفاتيح الشخصية كلها كانت فى ايدها وكانت بتلعب بيهم بمنتهى الاتقان
عرفت فعلا معنى ضريبة انك تعمل حاجة عظيمة و اسطورية , حاجة من اتنين يا تموت يا تتجنن وهى ماتت مجنونة , يا نهار اسود
بجد حرام اللى حصل فى الفيلم دة , انا اسف انة بقول علية فيلم , دى ملحمة فعلا ملحمة و صراع اسطورى بين الشر والخير جوانا و انك انت اللى بأيدك بتكتب النهاية وبتحدد معالمها ماهمها كانت ضبابية الامور قدامك
بجد ارفع القبعة لكل من شارك فى هذا العمل حتى ولو بالنية كل واحد حرك كرسى من موضعة داخل البلاتو قد شارك فى صناعة تلك الاسطورة
ناتلى بورتمان .. انا حبيتك بالمعنى الحرفى للكلمة
دارين ارنوفسكى ...... انت صايع بالمعنى الكلاسيكى للكملة
ليست هناك تعليقات:
إرسال تعليق