الأربعاء، 11 ديسمبر 2013

الحياه تبتسم احيانا



المهم ان انا صحيت من النوم النهارده الساعه 7 صباحا مش عشان انا نشيط بس عشان صوت الهوا فى البلكونه كان مزعج لدرجه انه صحانى من النوم !!
خرجت البلكونه اعدل الستاره عشان الازعاج و اذا بتيار هوا غشيم يخبطنى فى وشى ف اكتشتفت اكتشاف عظيم جدا ( ان الجو هايبقى ساقعه النهارده D: ) دخلت تانى و قولت فى نفسى يا سلام ياض يا ابو احميد لو تغير هدومك و تنزل على الساعه 10 كدا تفطر فى وسط البلد ف الجو دة !! لكن الشيطان غلبنى كالعاده و دخلت كملت نوم !! لحد كدا الموقف طبيعى

الساعه 10 و نص , تليفونى بيرن و انا مستغرق تماما فى النوم , نفضت اول مره و قولت مش هارد ! التليفون بيرن تانى فقولت ارد بقى !
اتنين من اعز اصدقائى و اللى بعتبرهم من افضل المكاسب اللى طلعت بيها مؤخراً و دار بينا الحوار الاتى !!

- ايوة يا جمّال !! انت فين يا بن ال **** ؟؟؟
- انت بتكلمنى الساعه 10 الصبح !! هاكون فين يعنى !! فى السرير نايم يابن ال ***** !!
- طب احنا تحت بيتك ! يا تنزلنا يا نطلعلك احنا
- يابنى انا نايم و مكسل فشخ اقوم من السرير فى البرد ده
- انزل يا جمّال يا بن ال **** !! مع السلامه

قررت بعد عذاب شديد انى اقوم انزلهم و قولت انزل بهدوم البيت عشان يحسوا على دم اللى خلفوهم و يسيبونى ارجع اكمل نوم ! حطيت كوفيه على رقبتى و لبست الشبشب الجميل و نزلت !

بعد السلامات و التحيات و كدا !! هاه يا جدعان هنروح الشغل ولا فاكس ؟؟
رد جماعى بدون تفكير " فاكس يا اسطى " D:
طب هانروح فين ؟
احنا نطلع على قهوة صالح و نفطر هناك

الغريب انى لاقيت نفسى بقولهم ماشى بدون ما افكر

طلعنا على وسط البلد ! طب هانفطر ايه ؟
يالا نضرب كبده و سجق ؟؟!!!
رد جماعى بدون تفكير " يالا بينا D: "

ضربنا الشندوتشات و احنا على القهوه و حبسنا بطقم شاى لطيف

طبعا لا داعى لذكر ان الجو كان ساقعه لدرجه ان كوبيات الشاى كانت بتترفع زى كوبيات الميه الساقعه D:

بعد شويه رغى و نميمه على معظم افراد الوطن العربى !

يالانلعب طاوله ؟؟؟
رد جماعى بدون تفكير " يالا بينا يا اسطى D:"

الساعه بقت 5 و الوقت عدى بسرعه غريبه بس مفردات اليوم كانت مبهجه و مفرحه بشكل خلانى اروح البيت و انا مبسوط فعلا لدرجه انى اكتشتفت انى ما اتبسطتش بالشكل ده بقالى فتره :))

شكر خاص لكل ظرف قدرى و فوضوى و مش مترتب مسبقا ساعد ان اليوم يطلع بالشكل ده

الاثنين، 2 ديسمبر 2013

السلام منكم و اليكم ..


السلام .. كلمه تملئ الفضاء الموحش من حولى 
كلمه اتعلق بها فى صباحيه كل يوم استيقظة و لااجد رغتبى فى العمل ترقد الى جوارى

السلام عليكم جميعاً اينما تكونوا ..

السلام على قلباً تحجر من قسوة الوطن  

السلام على رفاق الدرب و الكفاح اينما وجدوا 

السلام على كل من احببت ثم لم استطع 

السلام على من احببت ثم استقلت 

السلام على لحظة خيبه الامل المقدسه 

السلام على العبارات السرمديه التى احتفظت بها فى رأسئ 

السلام على كل من احببتهم ثم استقالوا او لم يجدوا رغبه فأستقالوا هم الاخرين 

السلام على كل من تأذى من حضورى الباهت فى حياتهم 

السلام على الشمعه التى تضئ عتمه الطريق رغم ان عتمه الطريق تحتاج الى ألف شمعه

السلام على الطريق ذاتها 

السلام على اختياراتى  ان كانت خاطئه و ان كانت صحيحه 

السلام على لحظة الانتحار التى لم اختبرها بعد 

السلام على البحر و الرمل و الشط و الموج و معدات الصيد البدائيه 

السلام على اسكندريه 

السلام على المقاهى و المقاعد و احجار النرد واكواب الشاى النصف ممتلئه 

السلام على من مروا من فوق حياتى مصادفه ثم ذهبوا 

السلام على الرحيل و نظرة الوداع والالتفاته الاخيره و الدمعه التى تليها 

السلام على الدموع التى تعزف منفرده فى ليالى الشتاء 

السلام على نار الموقد و القهوة التى فوق النار و اعصابى التى فوق القهوة والنار 

السلام على هؤلاء المجهولون فى اطراف الارض 

السلام على الغرباء و الموتى الاحياء والاحياء الموتى 

السلام على الموسيقى الجيده اينما وجدت 

السلام على المكتبات و الكتب والورق والحبر و الاقلام 

السلام على نزار و ادوارد سعيد و محمود درويش و امل دنقل فى قبورهم 

السلام ! السلام كل السلام عليكى 

السلام على المشاعر التى جفت من فرط الاهمال 

السلام على المشاعر المهترئه من فرط التمزيق 

السلام على البيانو و اوراق النوته الموسيقيه و عصا المايسترو 

السلام على الاحلام التى تلوح من بعيد 

السلام على الكلمات التى تعرف طريق القلب دون بوصله 

السلام على العينان الوديعتان 

السلام على محطه الباص و القطار 

السلام على اول شجره قهوة فى التاريخ 

السلام على الانسان مهما كانت ديانته 

السلام على العظماء 

السلام على الحب 

السلام على الشتاء و المطر و الاكواب الدافئه و ملمس الصوف و رائحه المطر 

السلام عليكى و على عبيركى و على خطاكى و على عيناكى و على دموعك 

السلام و السلام فقط ..

دمتم سالمين 

احمد . 

الأربعاء، 27 نوفمبر 2013

غداً يوماً أفضل


مبدئياً و اختصاراً لكل المقدمات , اود الاعتذار لشخصى و مدونتى و لكل شخص اعتاد قراءة اى حاجه مفيدة او غير مفيده هنا , اخر بوست كتبته من حوالى شهرين و ان كانت هناك اسباب وراء الحدث فدعونى اسرد منها قليلاً

اولا : لقد تطور لدى شئياً ما لا ادركه ولكنه يقذفنى بقوة نحو اقتناع كامل اننى لست هنا ل أدون و انما ل أكتب " فرق شاسع بين الفعلين " و فى الحقيقه لا طاقه لدى ل أشرح الفرق

ثانيا : اصبح خلقى اكثر ضيقاّ من زى قبل و هذا ليس بجديد و اعتقد انكم تعرفون هذا عنى

ثالثا : مؤخرا فقدت تلك المنطقه فى عقلى التى تجعلك تتوقف عن العمل وقتما تشعر بالتعب فصرت الضم الليل بالنهار منكفياً فوق العمل و ان انقطعت العمل ف انا اقرأ عن كيفيه تطوير العمل و ان تحركت من فوق مكتبى ف انا افكر فيما قرأت و انا اعد قهوتى امام البوتجاز ثم اشرب القهوة و انا ابحث عن الافضل فى العمل و الان استراحتى انتهت و اعود الى العمل مجدداً

رابعا : العمل اصبح كثيراً

خامساً : لا يوجد خامساً ف انا لا اتفائل ب رقم خمسه

سادساً : لقد غيرت نشاطى الاكاديمى نهائيا و بلا رجعه ف انا لم اعد مهندساً بعد اليوم و ان كانت عقليتى تشكلت تماما فى اطار هندسى و لكن تبقى شهادتى الجامعيه ليست هندسيه

سابعاً : تعرضت ل مأزق عاطفي ليس لطيفاً بالمرة و ان كانت حالتى العاطفيه مستقرة نوعاً ما

ثامناً : اصبحت على قناعه كامله بأننى كائن لا يطاق حتى فى الطف حالاتى

تاسعاً : اكتشفت فى ذاتى موهبه جديده , انا قادر على الاصغاء لساعات متواصله و بدون انقطاع لو كان المتحدث/ة شخصاً احبه او احب صُحبته

عاشراً : انا مقبل على نقله مهنيه تعتبر الاصعب فى تاريخى المهنى

حداشر : فاكس انا مش هاقعد اكتب احدى عشراً و بتاع انا فاشل فى النحو اصلا D:

اتناشر : سمعتى المهنيه على المحك ( ادعيلى يا كابتن و النبى عشان انا طالع دين اهلى )

تلاتشر : سعاد ماسى مغنيه عبقريه و البشريه لسه ما انجبتش واحده زيها , و انا مكلم واحده صحبتى نحاته عشان تعملى تمثال ل سعاد عشان احطه عندى على المكتب

اربعتاشر : ارجوكم لا تأخذونى على محمل الجد ف انا شخص تعلم الضحك على كِبر

شكرا لسعه صدوركم :) 

الأحد، 1 سبتمبر 2013

ما تتركنى هيك ..


حبيبتى ان يسألوك عنى يوما 
فلا تفكرى كثيراً 
و قولى لهم بكل كبرياء 
يٌحِبني .. يٌحِبنى كثيراً
صغيرتى : ان عاتبوك يوماً 
كيف قصصت شعرك الحريراً 
من بعد ما ربيته شهوراً 
قولى لهم " انا قصصت شعرى لان من احبه يحبه قصيراَ " 


ولاننى لست بارعا فى البدايات او المقدمات لذا اترك الامر ل نزار كى يفتتح الطريق الى كلمات قد امتلئ بها رأسى ولم اجد سبيلا غير الكتابة متنفس لها 

اكتب الان و قد قررت التخلص من كل ما فى رأسى بنقرة قلم و طقطقه مجموعه من الحروف البلهاء المتراصه فوق الكيبورد بشكل عشوائى 

اكتب و قد تركت نفسى تماما لصوت سعاد ماسى تغرد " صغيرا علينا الدنيا " ثم تشدو بأن " مالو " و انا لا ادرى مالى ؟ لو كنت أدرى لما استمعت الى سعاد , سعاد هى صوتى عندما لا اعرف اين انا !! سعاد هى صوت حزنى حين يغنى منفردا

اكتب بعدما اتى القرار و انا فى وسط اصدقائى !! اتى القرار تماما فى منتصف نقاشنا حول ايهما افضل " الشيشه عنب ولا الشيشه كريز " ؟؟ سؤال وجودي محير بالطبع ولكنه استهلك تقريبا ثلثى وقت جلستنا اما عنى فقد انفصلت عن الجلسه بعد ان تصاعد الدخان من فمى  محملا بكم محترم بالمشاعر و تورات الاصوات و اصبحت لا اسمع شيئا سوى سعاد تغنى من بعيد فعلمت انه حان الوقت !! الحزن يطلبنى و انا المغلوب على امرة ولا مفر سوى تلبيه النداء , و بعد ان انتهت جلستنا بأن كوكتيل الكريز على العنب يخلق شيئا غير مفهوم و لكنه الافضل .. 

عدت الى البيت , عدت و عقلى يباشر الطقوس ذاتها فى كل مساء , ادخل من الباب , اتخلص من كل ما فى جيوبى ثم اتوجه للبلكونه و انظر للنيل وهو مظلم تماما و الاضواء تأتى من بعيد ثم اساله " ازيك يا نيل ؟؟ كويس ؟؟ ثم اجيب نفسى طبعا كويس " بعدها اطمئن ان امى نائمه و انها متغطية كويس و مش معليه التكييف عشان التكييف العالى بيجبلها برد وهى بتكرة الادوية 

جولة سريعه فى ارجاء الشقه وهى جولة بلا هدف و كأننى اطمئن ان كل شئ تماما كما تركته ثم اشكر الله على نعمه السقف الذى يظلنى و اسرتى و ادعو الله ان يديمها نعمه و كفى 

اجيبلك تاكل ؟؟ ... لا انا اكلت برة , تلك هى واحده من اقوى العبارات التى تربطنى بأختى الصغيرة ثم تشرع فى التعلق بذيلى طوال مرحلة طوافانى بالشقه , تحكى لى انها زعلانه من صاحبتها عشان خرجوا وراحو سينما وهى لم تكن تحبذ السينما . مالو النادى يا احمد ؟؟ مالوش يا حبيبتى , المرة الجاية روحوا النادى , ردود اتوماتيكيه اجاوب بها دون ادنى تفكير مسبق فقد وصلت مرحله من الاحتراف انى استطيع الاجابه على كل اسئلتها و انا نائم تماما وهى مقتنعه تماما انى متيقظ , مارا بكل العقبات اللفظيه التى تضعها فى طريقى كى تختبر مدى تركيزى مع كلامها وهل انا منتبه ام اننى just saying mmmmm بعدها تأتى واحده من اجمل لحظاتى ! عمل كوباية نسكافيه وحشة بلا فخر انا افشل واحد يعمل نسكافيه ولكننى لا اتحمل ان اتناولة فاشلا من اى يدا اخرى 

اجتمع انا و مج النسكافيه وسعاد فى البلكونه , افترش الارض اتمدد بكاملى على الارض محملقا فى السماء لحين ان يصل النسكافيه الى درجه الحراره الملائمه التى لا تستطيع مشاعرى عندها التوقف ع البوح الى النيل وسعاد 

اتمتم قليلا مع سعاد بجزائريه اكثر من سيئة و فرنسيتى الرديئة ثم اترك لها المجال لان فمى مشغول بقياس مدى ردائة النسكافيه بتاعى و كعادتى امنح نفسى جائزة الاوسكار اسوء نسكافيه لهذة الليلة , و سعاد مازلت مقتنعه تماما ان " صغيرا علينا الدني " انشغل قليلا بقضايا معاصرة ثم قضايا غير معاصرة ثم اعود الى سعاد , اصمت قليلا ثم احدث نفسى " كل شئ على ما يرام " رحله صيد طويله و سيعود كل شئ الى مكانه المعتاد , ماهذا الكذب , الصيد فى النيل لا يريح اعصابى انه فقط يفرغ عقلى من المشاكل !! انا اشتاق الى البحر , البحر يفهمنى جيدا و يعرف ايضا كيف يغسل جروحى بماء مالح لكنه غير مؤلم , انه البحر .. يبتلع كل حزنى و يلفظنى جديدا على وعد ان اعود حينما اجد نفسى فى حاجه الى العودة و انا الوح اليه وحيدا " سلام يا بحر " .. 

لماذا لا ادخر ثمن تذكرة الطائرة الى سيراليون ؟ و اجمع اغراضى و الموسيقى و بعض الكتب والسجائر و اتوجه الى هناك ... سيراليون قلب افريقيا النابض بالحياة 

ثم اكتب Goodbye Note الى اهلى و لن اخبرهم اين انا , ولكننى سأقول اننى ذهبت الى ارض الموعد و لا تقلقوا على , انا فى مأمن طالما انا هناك , و ان اصابنى مكروة ف مرحى !! ليس هناك اجمل من ان تصاب و ان فى قلب الجنه , الجروح تداوى نفسها و الالم يلعق نفسه من تلقاء نفسة .. 

اعتقد ان تلك الاجابه وافية !! 

لو فاضلك 24 ساعه فى الحياة هتعمل اية ؟؟ 

هاركب الطيارة ل سيراليون و اخرج فى رحله صيد فى المحيط من هناك . انا و سعاد ماسى و ايسو ( الكلب بتاعى ) فقط !! بعدها اعتقد اننى سأموت سعيد البال 

ولا بأس من شويه سجائر captain black   , اتس ماى فيفوريت :)

و عندما عدت سألونى ...!!!


? why do you write
i write for fun and documentation

لا اكتب لأحد فقط اكتب لى !! انا استحق ان اكتب لى , فأنا شخص رائع فى العطلات الرسميه و الاجازات , اما عن باقى ايام السنه فمن المفضل ان تتركنى وشأنى 

لا داعى ان اذكركم بأن ألبوم مشروع ليلى يحوى تعريفا جديدا للعبقريه الموسيقيه و لا ادعى كذبا ذلك , فأنا شخص يشم رائحه الموسيقى الجيدة من على بعد أميال ضوئيه و بالمناسبه عنوان البوست هو نفس عنوان واحده من اجمل اغانى الالبوم و لكنها كانت الاكثر ملائمة لحالتى 

لا اكتب هنا كثيرا و لااعرف لماذا , او بالاحرى لاننى شخص سريع الملل ! 

و الان قد حان وقت النوم لان عندى شغل الصبح و اكل العيش مر و كدا و دراما كوين بقى و كل سنه وانتوا زى ما انتوا !! :) 

*الصورة الاولى للعبد لله فى المكتب بتاعى فى الشغل و الصورة تم التقاطها على سهوة و من غير ما اخد بالى , واللى قدامى دة قصر عابدين :))

*الصورة التانيه بتتكلم عن نفسها لوحدها 

الاثنين، 12 أغسطس 2013

The Last Gesture


مافيش داعى للكلام ...

مافيش جديد , انا و عارفنى كويس و عارف ان اى سيناريو فى الدنيا نهايته حزينه حتى لو المخرج قرر يجمل النهايه !! 

سيناريو حياتى محتاج مخرج فرنساوى عشان انا بحب المخرجين الفرنساويين و كمان بحب اى حاجه فيها كلمه باريس !!

مش متعود اكتب فى فترات قريبه من بعض بس الوضع يستدعى كدا !! 

انا اسف عشان انا عارف انى شخص صعب احتماله بأسلوب حياته الغير أدمى ..

 

الجمعة، 9 أغسطس 2013

البوست بتاع العيد


الحالة الغريبه اللى انا فيها اليومين دول , حاله مش بتعدى عليا كتير و الغريب انى عارف كل ملابسات الحاله و كل اعراضها و كل العلاج المطلوب عشان اخرج منها و مع هذا تلاقينى مستمتع تماما ب التتنيح فى ال لاشئ و اكل الايس الكريم من جردل الايس كريم و انا بسمع سعاد ماسى 

التتنيح ليس واحد من هواياتى المفضله ولكننى لاقيته مؤخرا دمو حفيف خصوصا لما بكون هربان من الشغل وقافل تليفونى و مش برد على الايميلات نهائيا 

المهم انى مش عايز اكتب و ماليش نفس اكتب رغم انى عارف انى ماليش غير الكتابه بس عموما بردو التتنيح حلو و كل سنه و انتو طيبين 

واللطيف ان مصر كلها كانت بتحتفل ب عيد ميلادى فى اول يوم العيد ! و دى كانت حلوة خالص و ناس كتير اوى كلمتنى و بعتتلى رسايل 

وعلى صعيد اخر مايك ماسى بعتلى رساله طويله فشخ عشان يقولى كل سنه و انا طيب بمناسبه عيد ميلادى و دى من اكتر الحاجات اللى فرحتنى فعلا 

و الشيشه العنب طعمها وحش فشخ و الواد شادى ده حمار و ما بيفهمش فى الشيشه و انا غلطان انى سالتو اصلا 

و امى ايديها خدت على محفظتى اوى و ده مش حلو على صحتها و الغريب انها مش مقتنعه انها بتعمل حاجه غلط و بتقابلنى بمنتهى البراءة وتقولى انا خدت الفلوس اللى جيبك كلها , اصلا ماكنش معايا فكه !!!! 

اه وبالمناسبه انا اسف انى بقيت ما بكتبش كتير :) كل سنه و انتو طيبين 
 

الأحد، 23 يونيو 2013

جواب الى ساره

عزيزتى / سارة 

ازيك ؟؟!! ما اعرفش ان كنا اتقابلنا قبل كدا ولا لا !! بس فى الحالتين محتوى الجواب مش هايفرق كتير 
متعه الحكى لناس مانعرفهاش متعه مش ناس كتير ممكن نحس بيها 
 مصر يا سارة بقت وحشه اوى !! بقت زى ما قولت على تويتر !! مصر بقى طعمها اكثر مراره من اخر بوء فى فنجان قهوة ساده 

فناجين القهوة بقت مابتتقطعش من قدامى , السجاير بقت جزء من صوابعى ,  طموحى كله بقى بيتلخص فى تذكر هجرة عن طريق البحر الى اى حته فى العالم ان شاالله حتى الصومال 

الجوع هايبقى اهون بكتير من الاحساس اللى بقيت بعيشو فى مصر كل يوم 
جربت كل انواع الهرب و منفعتش , مؤخرا بقت بنتحر تحت مسمى , الشغل 
بقيت اشتغل 19 ساعه فى اليوم و احيانا 20 , حتى الوقت اللى بقضيه فى المواصلات بقيت الهى نفسى فى كتابه العك على تويتر او قراءه عك الاخرين هناك , عشان ما اركزش !! 

عارفه ياساره !! حرقوا اسره كامله مكونه من اربع افراد !! عشان اكتشفوا انهم من الشيعه !! تخيلى ؟؟!!

الدور الجاى على مين ؟؟ على المسيحين ؟؟ وبعدين نوسع الدايره شويه ونضم اى انتماء سياسى مخالف لأحزاب الاسلام السياسى !! بقينا زى ايران و بنقتل الناس لمجرد الاختلاف معاهم فى مذهب !!
شوفتى وصلنا لفين ؟

زمان !! مش زمان اوى يعنى , كان عندى استعداد اخد رصاصه فى صدرى عشان مصر تبقى دوله احسن وكنت هاموت فرحان , انى قدمت نموذج للعايشين على ان الانسان ممكن يموت عشان حاجه بيحبها 

دلوقتى لو شوفت مصر كلها بتولع و فى ايدى الميه , هادلقها فى الارض و ما اطفيش بيها مصر 

مشهد الاطفال اللى نايمه على سلالم المترو بقى عادى !! مشهد العجوزة ام 60 سنه اللى طالعه تبيع مناديل فى المترو بقى عادى !! مشهد الاغتصاب الجماعى فى عز النهار بقى عادى !!! كل المشاهد بقت عادى !! لدرجه خلت السينما اللى هى اصلا مبالغ فيها تبقى تافه و مش بتنقل واقع !!

انا اروح اغسل اطباق فى دوله بتحترم البنى ادم و انام من غير عشا , اكرملى من انى اقبض 20000 جنيه فى دوله الانسان ارخص حاجه فيها !!

اقولك ايه ولا ايه ؟؟ 

انا مش هاقولك انا هاسيبك تفهمى لوحدك !! 

خدى بالك من نفسك 
سلام 
احمد  

الخميس، 20 يونيو 2013

كلام والسلام




حوار اعتيادى بيتكرر فى كل مره

انت كويس ؟ آه.........أنت بتكذب ؟ آه . 

انت كدا لوحدك اوى و ده مش كويس عشانك !!

طب اعمل ايه ؟؟ ما انا اصلى اتعودت على كدا ! , بردو مش صح 

و فضلنا نتمسك فى الفرح من غير ما نسأل عن السبب !! لحد ما السبب افتكرنا وجيه لوحدو من غير ما حد يسأل عنه !! 

عن كل حاجه بتحبها وبردو بتقف تتفرج عليها وهى بتضيع منك 

عن كل حاجه بتفرحك وبردو بتقول انا اصلا مبسوط من غير حاجه 

عن كل الكدب اللى كدبتو على نفسك رغم انك عارف الحقيقه 

عن كل الاحلام اللى انت عارف انك هتموت قبل ما تحقق منها حاجه 

عن كل حب قابلته و خسرته عشان انت غبى وحمار 

عن كل اللى سحلتهم معاك فى طريقك من غير ما تاخد بالك 

عن كل اللى اتعلقو بيك وانت سبتهم فى نص الطريق . 

عن كل اغنيه حلوه سمعتها وبعدين نسيتها . 

عن كل زعل الدنيا اللى بيروح فى ثانيه , عشان لحظه حلوة عدت عليك 

عن كل الوهم الجميل اللى بتعيشه كل يوم من اول ما تصحى لحد ما تنام .... 

عن كل الورق اللى اتحرق !! مكتوب فى نوت بوك  او اتحرق فى سيجاره ملل 

عن كل , وعن كل و عن كل !!!. والكلام يطول والعمر قصير و بيقصر و الناس مشيت و بتمشى وهاتمشى و اهو كلنا ضيوف فيها ..
 



 

الثلاثاء، 11 يونيو 2013

حاول ماتركزش

بدون مقدمات , فالمقدمات كلها حمقاء ولا فائده منها فالجميع يعرف انك تتحدث من اجل شئ ما , لندخل فى صلب الموضوع 

الاشياء ذاتها قد تكتسب معانى اخرى لو فعلها اخرون امامنا !! تماما كعلاقتى بالعلاقات العاطفيه و تلك اكثر الجوانب اظلاما فى شخصيتى 

ارجوك لاتسألنى عن تفسير لما هو مدون بالاعلى , ضعه فى خانه السف لو اردت لكن ابتعد عن سؤالى !!

- رغم كل اخطائى والتى لا تحرك ساكنا فى داخلى الا ان واحده تقتلنى بفرط ثقلها 
- رغم كل من احببت الا ان واحده فقط هى التى علقت فى الذاكره و رفضت المرور بسلام
- رغم كل مبادئي اللعينه الا اننى لم التزم بواحد منهم ابدا 

شكرا 
 

السبت، 11 مايو 2013

الهروب علينا حق


اول كلامى السلام عليكم , السلام عليكم , السلام عليكم 
حاولو تحسوا بعظمه الكلمه , السلام !!! والسلام عليكم كلكم مش على بعضكو او الحلويين منكو بس , السلام على الاخيار لخيرهم والسلام على الاشرار لتجنب شرهم 

وكعادتى فى بدايه كل بوست ببقى مش عارف اقول زى اللى رايح يقابل حبيبته لأول مره !!! موقف مش ظريف بس بيعيش فى الذاكره لوقت طويل و ده سبب حبى الابدى لكل البدايات اللى ربنا خلقها رغم رخامتها وصعوبتها الا ان ليها متعتها الخاصه 

فى الفتره الاخيره حاسس ان فى حاجه غلط بتحصل فى حياتى , الوقت بقى بيعدى بسرعه لما اعدها من قبل , وكأن فى حد بيجرى وبيسحب حياتى وراه والغريب والمنافى لكل قوانين الطبيعه ان بعد فتره من الجرى لازم يتعب ويهدى و رتم حياتى يهدا شويه لكن الغريب ان اصبح اسرع و اعنف للدرجه الكافيه اللى تخلينى اسئل نفسى كل يوم لما اصحى من النوم 

هو انا النهارده ولا امبارح؟؟

طاحونه ضخمه بتطحن الوقت والمجهود والمشاكل و العلاقات الفاشل منها والناجح و بتخرجلى بمزيج جديد اكبر حجما و اكثر تعقيدا و انا الثابت الوحيد فى كل الامور 

كل حاجه تدعو للهروب لجبال البحر الاحمر حيث اصوات طيور النورس تملئ الفراغ , ارتطام الموج بالصخور كافى لمحو كل ذنوبى و حماقاتى بل انه كافى لمحوى انا شخصيا ,,, و  فى مقوله اخرى لصديق عزيز ان جبال سانت كاترين هتنضف بقايا اخر عشرين سنه فى حياتك...

المعادى شارع 106 , الدور الرابع , البلكونه , لسه مش عارف استوعب فكره انى هاسيب البلكونه دى واروح مكان تانى فيه بلكونه تانيه حتى لو كانت بلكونه اكثر اتساعا واكثر رفاهيه و بتطل على النيل عدل 

الحكايه مش حاكيه نيل و رفاهيه وبتاع !! القصه فى القصه , اول ماجيت الشقه دى ماكنتش حابب البلكونه دى خالص وكنت بحب البلكونه اللى اوضتى اكتر و كنت ماليها زرع و عامل منها ملاز ليا لكن بعد فتره الامور اختلفت والسبب كان انه فى ليله من ليالى الشتاء القارس , الدنيا مطرت و ساعتها كانت حفله سعاد ماسى بتتذاع على رادو ترام و مج النسكافيه كان بيضارع انه يفضل سُخن فى الليله دى لاقتنى اخدت المج وخرجت البلكونه وكانت اول مره اشوفها جميله كدا !!! صوت المطر و هو بيضرب ورق الشجر مع الهوا وهو بيهز فروع الشجر , و مع اخر انفاس البخار اللى خرجت من المج وهو بيعلن انه خلاص بقى بارد لاقتنى بضحك لوحدى ومن دون ابداء اى اسباب و اكملت سعاد ماسى , احكى ياراوى و من هنا وقعت فى حب البلكونه وفضلت فى الليله دى قاعد فى البلكونه لحد الصبح رغم ان الجو كان سقعه جدا وانى اخدت برد كمان الا انه كان اجمل دور برد فى حياتى كلها 

امى مؤخرا قررت اننا نخرج على كورنيش المعادى عشان هى بتحب منظر النيل !! طب انا مالى ؟؟ انا بحب منظر النيل جدا لكن الطقوس اللى حصلت و خلتنى احب البلكونه هنا مش هاتتكرر تانى لان لسبب بسيط مستحيل هايحصل تزامن انهم يذيعوا حفله سعاد ماسى والدنيا بتشتي تانى !!!!!!! 

غير ان انا متعلق جدا بشارع 106 !! اسمو حلو كدا وتحس انه متناسق ورشيق , الشارع بحسه شبهى جدا !! الناس اللى ساكنين فيه ارستقراطين واشباه ارستقراطين و انا واحد منهم !! هما شبهى وانا شبهم , مش بحسنى غريب وانا ماشى هناك او و انا نازل اجرى الصبح و اقابل الست اللى بتنزل تتمشى الصبح هى والكلب بتاعها  وكل يوم اصبح عليها وهى تصبح عليا و احنا اساسا مانعرفش بعض لكن رابط 106 جمع بينا , ده انا من كتر حبى فى الشارع قررت انى اسمى اول روايه ليا " شارع 106 " و كانت هتبيع كتير فشخ فى المعادى !! D: لان الناس كانت هتفتكرو دليل او خريطه لان ما اعتقدش انه فى قاهرى ماتهش قبل كدا فى المعادى !!!

بس يالا اهو حكم القوى !! هاروح البيت الجديد !! امى بتقول انه احلى من البيت اللى احنا فيه و الناس اللى ساكنين هناك معظمهك من رجال الاعمال الكبار وسيدات الروتارى !! انا مش شبه الناس دول !! انا واحد اول مابيجوع وهو فى الشارع اول حاجه بتيجى فى باله " هو فين اقرب عربيه فول ؟؟!! " و فى خلال سفرى بره مصر كانت اكتر حاجه بتزعلنى انى مش بلاقى عربيات الفول فى كل شارع مصرى اصيل و كوبايه الشاى الحقيره و مع هذا بتكيفنى !! 

مشكلتى مع الناس اللى المجتمع بيطلق عليهم لفظ ال peak انهم ما بعيرفوش يتعاملوا مع حد هو مش منهم او عاش فى وسطهم , عشان كدا ليهم اماكنهم اللى ماحدش بيروحها غيرهم , بيتجوزوا من بعض دايما , البيزنس بتاعهم كله مرتبط ببعضه , كلهم عارفين تاريخ بعض !! انا مش الناس دول !! جايز بحكم شغلى بحتك بيهم كتير لكن رغم هذا حاولت بكل قوتى انى افضل بقايا الارستقراطى 

اما عن بقايا ارستقراطى فيرجع تاريخ العائله !! الى ان جدى الاكبر رزق باشا الجمال !! كان من اعيان شبرا مصر , تقول الاسطوره , ان أل الجمال كانوا بيملكوا نص شبرا تقريبا ايام ماكنت لسه معظمها اراضى زراعيه ومع وصول عبد الناصر و قوانين الاصلاح الزراعى اللى يادوب سابت لجدى البيت اللى فضل عايش فيه لحد ما مات من الحسره !! ولهذا السبب ان ابويا و كل اعمامى بيكرهو عبد الناصر رغم ان اغلبهم لم يعاصره !! ابن عمى دايما يقولى " لولا عبد الناصر كان زمانا بنجرى ورا العيال بالكرباج دلوقتى " D:

مش عارف ان ايه اللى بيخلينى احكى كل الرغى ده , بس اهى طاقة زياده و لازم تخرج بقى ! و المشكله اللى بقيت بواجهها مؤخرا انى مابقتش عارف اتكلم براحتى خالص , فى كل مكان هتلاقى ناس تعرفك و مش هتاخد راحتك فى الكلام , تويتر , فيس بوك , لينكد , يمكن هنا هو اقل عدد ناس تعرفنى شخصيا , عشان كدا بحكى براحتى سيكا , فمتعه الحكى للأغراب مالهاش مثيل 

 و اخيرا ! انا محتاج اجازه طويله من غير موبايل و من غير انترنت , ومن غير اى تكنولوجيا , هو راديو صغير و شويه كتير كتير و سجاير ميريت , او LM احمر على حسب الحاله الماديه بقى , و بس , و الله هابقى كويس بعد اجازة زى دى بس هى فين , ده مش عارف هاعمل ايه فى البلاوى اللى ورايا , شغلى و شغل ابويا و مشاكلى الشخصيه , و امتحاناتى و الخ الخ 

كان الله فى عونى بقى 

والى اللقاء فى حفله اخرى من حفلات الفضفضه اللى من غير حساب

الأربعاء، 24 أبريل 2013

الامور ليست على ما يرام

الامور لن تصبح على ما يرام دائما ولن تصبح سيئه دائما ايضا فدوام الحال من المحال او هكذا يقولون

منذ فتره بعيده وهناك فكره تطاردنى بشراسه , اين ذاك الحلم الذى ظل يلعب براسى نائما و مستيقظا و مستلقيا جالسا او ماشيا او حتى هاربا

اين حلم الفتاه الجميله التى تقتحمنى من كل الجوانب لتسحبنى بعيدا عن هذا الهراء الدائر من حولى رغم ان وقتها لم يكن هناك الكثير من الهاء كما الان

اين ذهبت ؟؟ اين ذهب الحلم ؟ اين ذهب الخيال الابيض الناصع ؟؟ اين ذهب هذا البحار شديد الاناقه و الذى حفر البحر ملامحه ؟؟

ولا يزال البحث جاريا


الجمعة، 22 مارس 2013

break2

i`m too good for someone like you

 ....Recently i believed so
 but yesterday i was thinking , which concept of ours holding the right meaning ?? yours or mine or none of them or both of them 

you know what ?? once upon time Hemingway said 
we are not civilized enough 
and i trust the man`s tongue 

  

الأربعاء، 20 مارس 2013

Break

i need a break
break from what ??? i don`t even know
just break
life sucks
studying sucks
job sucks
so , i`ve invented an event for a group suicide event
wanna join ?? be my guest
tickets available everywhere u can imagine and u can`t
ticket price is too hot but it deserve the risk
uniform code : mmmmmmmm it does not important to wear something
ticket price : all your balance
we will gather in hell to start a one way trip
Every man's life ends the same way. It is only the details of how he lived and how he died that distinguish one man from another.
Hemingway 
>>>>>>>>>>>>>>>>>>>

Dear Optimist, Pessimist, and Realist,

While you guys were busy arguing over the glass of water, I drank it.

Sincerely,
the Opportunist 

 

السبت، 23 فبراير 2013

و كأننى ارى


و كأننى ارى كل شئ بوضوح شمس صيفيه , وكأننى قاربت على فهم ما انا مطالب به و ما انا مطالب بالأبتعاد عنه , و كأننى وقعت اسيرا فى صوت سعاد ماسى و لن اسعى للتحرر منه ابدا.
وكأننى قررت ان اعلق لها صوره ضخمه فى حجرتى كى اراها يوميا قبل ان اذهب الى النوم .
هدوء البحر و صوت رنين الهاتف لا يجتمعان ابدا , و بالامس تحرك البحر فى ثوره لم ارى مثلها ولا حتى فى كتب الخيال العلمى 

البحر يثور على نفسه يطلم جسده بموجه , ويلقى بموجه على الصخور و كأنه يعاقبها على ما اخرجت له من الباطن الى السطح ثم اخذت من السطح و خسفت الى القاع 

ان مشاعرنا و امواج البحر شديده التشابه حد العجب , فالموج يبدأ قويا عاليا متحديا كل ما امامه كذلك مشاعرنا , ثم تصل الى اقصى ارتفاع و فى لحظه لا ندركها تنهار من اعلى البحر و كذلك ايضا مشاعرنا و حين تصل الى الشاطى او الى المنتهى تكون قد تلاشت تماما و لا يبقى منها سوى القليل من كرايات الهواء و الملح البيضاء ثم تنسحب من جديد الى البحر 

اجمل ما فى البحر انه يمنحك حريه البكاء دون ان يدرك الاخرين انك تبكى , انه يحضتن دموعك او بالاحرى انه يغسل دموعك بماء مالح 
صوتى لا يدركنى لأقول ما اود قوله فيدركنى عناء الاجتهاد و التفكير فى طريقه اخرج بها ما اود قوله و قبل ان انطق ما اريد , يلتهمه الكسل و ابقى انا بمفردى و بجوارى اوراق عذراء تنادينى كل يوم و كل ساعه لأكتب تلك المقدمه الادبيه التى ستدفعنى رغما عنى لأنهى روايتى و انا اتمنع عنها !!
حتى سجائرى ملت صمتى فكلانا يلتهم الاخر فى صمت تام , ولكنها مشكوره على كل حال فشخص مثلى تهرب منه كلامته اولى ان تهرب منه علبه سجائرة ولكنها لا تفعل 

انتهيت لتوى من " الاسود يليق بك " طوال فتره قرائتها انتابتنى حاله من التسامى و السمو فوق الاشياء و هكذا حالى دائما مع احلام , انها تدركنى من اضعف النقاط فى خطوط دفاعى , تغزونى من حيث انتظار ارتدادها و تدافع عن سطورها من حيث اتوقع انه انا المخول بالدفاع , تدركنى دائما بعنصر المفاجاه  , ولهذا قررت ان ارسل لها خطابا محموما بعاطفه الاشتباه العاطفى , من اين لكى بمفاتيح ابوابى ايتها المرأه الجزائريه ؟؟ ولا اتوقع ردا او قل اننى لا انتظر ردا فقد اعتدت ان اكتب الى البحر و لا يبالى هو بما اكتب ولا بما ارسل فقط يرسل الى امواج فارغه 

البحر لا يتحمل مسئوليه المسافرين على ظهره !! صفقه غير مبرمه بعقود . وقتما يشاء سيبتلع الجميع ولا ضمانات ولا عزاء لأحد و غدا سياتى المزيد طالبين ظهرا للسفر على متنه .  
       

الأربعاء، 6 فبراير 2013

كتير...


انا كارنينا و احلام مستغانمى و فنجان قهوه زياده بس مظبوط
وسعاد ماسى مش عارف هى بتقول ايه بس مسلطن 
ودخان سجاير بيسحب الهم بس مبيعرفش 
والنسكافيه ابو تسعه سكر و بردو مر 
و فراشه بتنام على كتفك 
و مشوار طويل 
ده كتير عليا   

الاثنين، 4 فبراير 2013

كوكب ايجار جديد





الحياه اقصر مما تتصور فلا تضيع جزء منها فى التفكير فى الماضى ," حقيقه "


بقالى اربع او خمس ايام ماخرجتش من البيت و مش عارف سبب واضح لقعدتى فى البيت , على الرغم ان ورايا مقابلات شغل لازم انزل اخلصها ومع هذا بكتفى بالايميلز 
 والتليفون  ...

بقيت بقعد على التويتر كتير و بتويت بغزاره رغم ان معظم التويتات فارغه من المحتوى الادبى و العقلانى المتحضر 
اى عك فى الصندوق و دوس تويت ولمزيد من العك اكتب #بس # خلاص 

عايز انزل معرض كتاب ومكسل , على الرغم ان دى السنه الوحيده اللى انا هابقى نازل وانا عارف انا عايز اشترى ايه من هناك 

لظروف خارجه عن ارادتى النهارده كان لازم انزل من البيت , اصل النسكافيه بتاع خلص ودى من اكتر عشر حاجات بتضايقنى فى الدنيا 

وللأمانه الادبيه , نفسى هفتنى على سجاره فى الهواء الطلق  , نزلت و اتمشيت حوالين البيت . واخترت ابعد سوبر ماركت عشان اشترى منو النسكافيه 

نومى مقلوب ويومى متشقلب , بسهر طول الليل لحد الصبح و انام طول النهار , فتقريبا مش بشوف اهلى رغم انى قاعد معاهم فى نفس البيت , يا هما صاحيين وانا نايم يا اما العكس 

اختى بتقولى ان دى بوادر اكتئاب , بس قولتلها انا معرفش ايه هو تعريف الاكتئاب , هو انا لو فضلت قاعد لوحدى عشره حداشر ساعه , حاطط اللاب على رجلى و بشرب نسكافيه وبسمع سعاد ماسى وسيلين ديون و ماجده الرومى , يبقى عندى اكتئاب 
طب والله الاكتئاب طلع لذيذ اهو 

وكعادتى لازم اهرب من اى حاجه بأنى اسخر منها !!!

كلهم بيقولوى انى ناجح بس انا دايما عايش بأحساسى انى فاشل , هافضل شايف نفسى كدا حتى لو اخدت جايزه نوبل فى الميلك تشيك اللى بالفراوله 

جايلى عرض شغل كويس !!! الحقيقه انو كويس جدا بس انا مش هاعرف اسيب شغلى اللى انا فيه دلوقتى , انا عارف انى جزء مهم فى شغلى وبعمل حاجه محدش غيرى هايعرف يعملها او يمكن انا محسس نفسى بكدا 
بس فى علاقه حب بين و بين شغلى دلوقتى , يمكن عشان حضرت الفكره من ايام ماكانت على الورق 

كلمت الناس واعتذرت على فرصه الشغل وقالولى انى more than welcomed فى اى وقت ....

انا لازم اخرج فى رحله , عشان اعيد ترتيب كل الورق , لان الموضوع كدا بقى خارج عن السيطره , فى تشويش فظيع والاحداث اللى فى البلد و اللى بحاول بكل قوتى انى افصل نفسى عنها , بتشوش على تفكيرى بشكل بالع الشده , انا ماكنتش اعرف انى بحب مصر , ولما سالت نفسى
انا بحبك ليه يا مصر ؟؟؟ ماردتش عليا 
انى واى ,, انا كدا كدا مسافر , يعنى كلها كام سنه اخلص من تأبيده هندسه اللى انا فيها دى و بعدين اشد الرحال و ارض الله واسعه 

مش هروب لكنه هروب من السلبيه , انا لو فضلت فى مصر هابقى سلبى وانا بيقتلنى شعورى بالسلبيه 
عموما انا سمعت انهم قرروا يمدوا معرض الكتاب لحد يوم 9 من هذا الشهر وكأنها اشاره انى انزل بقى , بس على مين ؟؟؟ بردو مش هانزل !!!!

وخلاص بقى  ....     

الأربعاء، 30 يناير 2013

حدثنى عن الاسوء


فى يوم شديد البروده و الترابيه و فى ارض بعيده تحدها المياه من كل الجهات 
قرر رجل ما لا اعرفه ان يترك كل ما يحب و يرحل بعيدا 
ولما سألوه عن السبب اخبرهم انه وقت اقامته على تلك الجزيره قد انتهى و تأشيرته اصبحت منتهيه الصلاحيه و لابد ان يرحل الى ارض جديده حيث لا احد يعرفه 

"و لأننى بحار فأن فى الترحال فلسفتى و لأننى طفل اهوج ف ال لا اعرف هى  كل  اجوبتى "    

عن قدر تعلقها بى حدثونى , قال لهم و مادراكم اننى لا اتأكل كسيجاره ملقاه فوق منفضه الرماد تحترق وحدها فلا صاحبها يدخنها ولا هو يطفئها 

اعزائى اهلا بكم فى عالم البحار , البحار كالشاعر لا يملك سوى شراع مهترئ سيأخذه الى حتفه وهو يعلم ذالك جيدا لكن لا حيله له فى الامر تماما كالشاعر فلا شئ ليده سوى قلم و اوراق صفراء سـتأخذه الى حتفه هو الاخر 

البحر غاضب والموج يلطم بعضه و الاجواء غير مستقره , لا يهم فطالما انه قرر الرحيل فى مجال للعوده 

فاللموت فى عرض البحر و على متن سفيتنى المحببه , متعه هى الاقرب الى قلبى 

تعودت دائما الا ابحث عن الاسباب وراء ما يحدث فمعرفه الاسباب لا تبطل العجب كما يشاع و انما تعطينا دوافع جديده للهروله وراء الاسباب لمعرفه مصادرها و الحقيقه اننا نحيى فى دائره , المولد هو بدايتها و الموت هو الوجه الاخر للبدايه 

سامحينى , فأنا جاف فى عواطفى رغم ارتباطى بالبحر , جاف فى فراقى رغم ارتباطى بالبحر , جاف فى كتاباتى رغم ارتباطى بالبحر , انا جاف من كل شئ الا ارتباطى بالبحر 

سامحى هذا الاحمق الذى يبحث عن جواهر البحر وعندما يجدها يلقيها الى الماء مره اخرى معللا بأن البحر اولى بجواهره لا الانسان .

صدقينى لم تكن على سبيل التجربه فانتى اثمن من ان تكونى مضمار تجارب , و انما  البحر علمنى ان القى بنفسى فى المياه وقتما اشتاقت السباحه و ليس حينما يحين وقت السباحه 

ستظل عظام مراكبى تحتفظ برائحتك فالخشب يعرف جيدا كيف يحفظ روائح الاحباء !! 

صدقينى لم اكن ممتن ل أحد من قبل قدر امتنانى لك فرحتلى معك سوف لن تُنسى و ساقصها على البحاره الصغار كى يدركوا جيدا ان لركوب البحار بعض الخسائر الفادحه 

وفى النهايه , وددت لو استطاعت كلمات الاسف التعبير عن جزء ولو ضئيل من اسفى على خسارتى , ستكشف لك الايام ان البحاره لا يعرفون الانانيه ولو كلفهم الامر سعادتهم الشخصيه !!

 

  

          


الخميس، 24 يناير 2013

تدوينه


تدوينه ...
اسمها تدوينه عشان مش لاقى عنوان للكلام هكتبه 
انا مش عارف انا مالى !!! 
داخل كدا على شهر و انا مش مظبوط , كل حاجه جوايا مش فى مكانها !! ده مش انا اللى انا متعود عليه 
صحيح مكركب من جوه بس كركبه قريبه من قلبى , لكن مؤخرا بدأت احس ان الكراكيب دى مش بتاعتى 
انا عارف كراكيبى كويس !! كراكيبى بتفرحنى لما بعدى عليها او افتكرها او اكلم نفسى عنها 
دى مش كراكيبى !!!! هذا ال أنا ليس ب أنا 
مافيش حاجه فى الكون ده بتزعلنى من نفسى الا احساسى انى بظلم حد معايا , يمكن اعدى اى حاجه لنفسى لكن ظلم الناس دى حاجه ممكن تخلينى افضل ليالى صاحى بكلم نفسى 

والمصيبه انى بظلم كل الموجودين فى حياتى دلوقتى بما فيهم نفسى 
بس نفسى متعوده منى على كدا !!!

وصلت لمرحله انى لازم اخد قرار , لازم احط كل حاجه فى مكانها , وارجع كل الكراكيب فى ماكنها عشان افضل أنا بكراكيبى 

من كام سنه ابويا قالى جمله و النهارده بس فهمتها 
كنت بكلمو عن الحب و الجواز و الاستقرار  , و كان حوار مثمر اوى على عكس معظم او كل حواراتى مع ابويا اللى بتدور حوالين البيزنس والبورصه و كل العك المالى ده 

لاقيتو بيقولى " انت هتعيش لوحدك و تموت لوحدك "
قولتلو " انا مش طالبه معايا فلسفه عل اخر الليل " و طبعا كنت فاكره بيهزر 

قالى " انت فاكرنى بهزر , بس انت ابنى و انا اكتر واحد فاهمك
ملامحه كانت بتقول انه بيتكلم بجد 
قالى " انت قلبك عامل زى تمثال معمول من الجليد , شكلو حلو  من بعيد بيخلى اى حد يقرب , بس ساقع لدرجه ان ماحدش ينفع يعيش جواه , ولو حد قرر ياخدو ويطلع بيه بره حدودك الجليد هايسح و ملامحه هتروح " 

من كام يوم لما افتكرت الجمله دى واسقاطها على واقع حياتى , كلمتو وقلتلو , انت طلعت فاهمنى زياده عن اللزوم " و قفلت الخط !!!

الى كل الناس اللى ف حياتى " سامحونى ان كان الامر فى استطاعتكم " 

انا متناقض و سأبقى هكذا لان هكذا يلائمنى تماما 

 انا مش عارف انا ليه بقول الكلام ده ؟ 
جايز عشان قربت اخد قرار انى اقفل المدونه عشان تلحق بأخواتها 

انا دايما كدا , كل فتره بعمل مدونه ارمى فيها شويه كلام و بعدين اقفلها و اقفل الاكونت اللى اتعملت بيه 
وكأنى بمسح تاريخى بمزاجى 
و رغم ذلك هتفضل دى المدونه الاقرب الى قلبى 
عشان قابلت هنا ناس جايز مش هاعرف اقابلهم تانى فى اى عوالم افتراضيه او حتى حقيقيه