الجمعة، 30 يناير، 2015

مالي عازة ... بس مش مطول


خلينا نتفق ان الفراق وحش و مشاعر الافتقاد بنت وسخه و مؤلمه بجد 

بس خلينا بردو نحط مجموعه المشاعر دي على جنب ... المجموعه كلها , الفراق و الحب الغريزي و الاشتياق و الافتقاد و التعود و الارتباط .. الى اخره 

و بعد ما نحط مجموعه المشاعر دي على جنب , نتخيل بقى ان انا مابقتش موجود .. تبخرت و تحولت الى لا سحابه خفيفه و مش موجوده تماما .. ايه اللى هايحصل ؟؟

يعنى ايه دوري ف مجموعه السيناريوهات اللى انا جزء منها ؟؟ 

سيناريو .. اهلي و قرايبي و الناس اللى رابطني بيهم صله دم ! عادى هايزعلوا سيكا لانهم اتعودوا اني موجود كل يوم ف البيت لكن لو شيلنا احساس الافتقاد ده زى ما اتفقنا من الاول .. هتبص تلاقي انى ماليش دور محدد و واضح ف حياتهم 

سيناريو الشغل بتاعي . انا مابخترعش الذرة ف شغلى .. هو صحيح شغل صعب و ابن ميتين كلب بس مش معجزة يعنى .. عادى يعنى لو انا بقيت مش موجود .. هايعملوا recruitment و يجيبوا واحد تانى مكاني و شكرا على كدا .. 

سيناريو اصحابي .. دول بقى ممكن يزعلوا سيكا لان عشرة الطاوله مش هتكمل لان احنا اربعه .. كل اتنين بيلعبوا مع بعض و الكسبان من هنا يقابل الكسبان من هنا و الكسبان ف الاخر خالص مابيحسبش على اللى هو شربه و ده هايسبب ازمه رهيبه طبعا بس عادى ممكن يصاحبوا واحد جديد و يكون بيعرف يلعب طاوله بردو و الدنيا تمشي بما انها مابتقفش على حد 

 

سيناريو حبيبتي .. هتصعب عليا فشخ والله .. بس عادى الدنيا هتمشي و هتعرف واحد تانى و يكون معاه فلوس عشان يجيب كل الحاجات اللى مامتها طلبتها و تعيش معاها و يخلفوا عيال و بعدين يطلقوا .. 

سيناريوهات كتير .. بس دوري فيها ثانوي فشخ او هكذا يبدو لي .. مع الاخذ ف الاعتبار اننا متفقين اننا نحط كل المشاعر على جنب و نتكلم كلام عملي  

ف النهايه : حاولوا تعملوا حاجه مفيده و النبي .. اى حاجه ...و ابقوا خدوني معاكم