امبارح...
اجتمعت فى حياتى الحاجات التلاتة دول مع بعض و ضيف عليهم سيلين ديون وهى بتقول i`m not sorry for my love تبقى كدة كملت
نزهة سريعة على كوبرى الجامعة فى طريقى وانا مروح البيت امبارح
كل حاجة على الكوبرى فى مكانها زى ما انا متعود عليها
عربيات الحمص فى مكانها و طبعا بتنش لان الدنيا تلج وعلى الكوبرى بقى ما اقولكش تلج تلج يعنى !!
الراجل بتاع اللب والسودانى اللى عمرى ما شفت حد بيشترى منة ابدا على الرغم ان السودانى بتاع حلو
الست اللى بتقف تبيع الورد لآى ولد وبنت ماشين مع بعض , حتى لو كانوا اخوات !!! هى ما بيفرقش معاها
الحبيبة اللى بيبقوا متوزعين على طول الكوبرى و بتبقى وشوشهم للنيل و مديين للدنيا ضهرهم و كأنهم اعلنوا العصيان عليها و احتموا فقط داخل اذرع من يحبون
المهم انى فى ظل كل كمية الحاجات المعتادة دى كلها , ظهر الغير معتاد !!!
صوت جاى من ورايا بيندة
- يا استاذ يا استاذ
- شيلت السماعة من ودانى و قولت نعم لواحدة ست شكلها فى نص الاربيعينات
قالتلى افتحلك الودع !!!
طبعا انا بكل بلاهة فضلت مبلم شوية من المفاجاة ومش عارف اقولها اية ؟
المهم انى بعد ثوانى من التفكير لاقيت نفسى رجعت لطبيعتى و ضحكت فى وشها وقولتلها شكرا و هزيت دماغى كناية على انى ماشى ومشيت
جت ورايا تانى
- يا استاذ يا استاذ , طاوعنى و اسمع كلامى , ومش هتندم
باللامانة ......... الفكرة زقزقت فى دماغى و كنت هاقولها ماشى
بس بردو وبمنتهى البرود , ضحكت فى وشها وسبتها ومشيت
بس وانا ماشى لاقيت خطوتى عمالة تصغر تصغر لغاية ما حسيت انى تقريبا مش ماشى و كأن من جوايا هاموت وارجع اقولها افتحى الودع يا ست !!!
كنت عايز اعرف هاتقولى اية ؟؟؟ انا بطبعى مش شخص ميال لسباقة الاحداث بالعكس انا بحب استمتع بكل الحاجات اللى حواليا فى الحاضر بمزااااج وعلى مهل اوى , ف معرفة الطالع بالنسبة ليا مش شئ جذاب
لكن لآول مرة احس انى وقفت على بوابة عالم جديد عمرى ما عرفت عنة او بالكاد سمعت عنة فى حكاية او شوفتة فى فيلم
عالم التعايش مع الطالع
مش عارف كان هايبقى احساسى اية لو قالتلى حاجة وبعد فترة حصلت حاجة مشابهة للى هى قالتة , عشان كدة كان نفسى ارجع و اسمع كلامها واطاوعها واعرف الودع !!!
بس لا انا رجعت ولا انا عرفت الطالع ولا الست استرزقت من ورايا و زمنها دعت عليا لغاية ما ريقها نشف !!
و توتة توتة فرغت الحدوتة
تصدق قفلتنى يا *** انا اتكرتك فتحت الودع بجد وكنت مستنى الاقيك فى الاخر تقولى توتة توتة..توتة دى تبقى اللى ***
ردحذفاممممم
ردحذفتعرف انا نفسي ف كذا حاجة من اول الشتا ده
عشان بارد اوي عليا
1- انزل وسط البلد وآكل بطاطا مشوية سخنة في شارع طلعت حرب والقصر العيني وشارع شريف
2-احضر حفلة بالليل لعلي الحجار في ساقية الصاوي واجيب حمص الشام وانا راجعة بتمشي في الزمالك بالليل
3- اروح سوبر ماركت كبير عشان اجيب كل انواع الشوكولا اللي جربتها واللي مجربتهاش قبل كده ..لحد ما اخلص الفلوس اللي معايا واروح مشي :))
بس خوسارة انك مرجعتش للست بتاعت الودع ديه D:
بحب اسمعهم مع اني عمري ما سمعتهم
@هايبس : انت سيس :D
ردحذف......
@رضوى : اول واحدة دى سهلة خالص , و تانى امنية سهلة بردو بس تتوقف على جدول الساقية الشهر دة منزل على الحجار ولا لا ؟؟:D
اما الامنية الاخيرة دى مأساة لانى عيشتها قبل كدة بس هى تجربة تستحق المحاولة بس النتايج مش على ضمانتى :D:D
والله انا كمان كان نفسى ارجع و من جوايا بقولها لو اتحايلتى عليا مرة كمان هاقف واسمعك بص النصيب بقى !!!
وانا كمان بحب اسمعهم مع انى عمرى بردو ما سمعتهم :))
بقولك يا برنس انت كده ميه ميه
ردحذفاصل هتستفيد ايه لما تعرف مش هتعملك حاجه غير انها تشغلك بشوية هواجس تفكر فيها
لا عجبتنى الحدوتة بامانة وخصوصا انك مريحتهاش بردو فى الاخر
مش فكرة هواجس خالص يا اسلام بس فكرة حاجة جديدة وغامضة فى نفس الوقت , انت اكيد فاهمنى
ردحذف