الخميس، 24 يناير 2013

تدوينه


تدوينه ...
اسمها تدوينه عشان مش لاقى عنوان للكلام هكتبه 
انا مش عارف انا مالى !!! 
داخل كدا على شهر و انا مش مظبوط , كل حاجه جوايا مش فى مكانها !! ده مش انا اللى انا متعود عليه 
صحيح مكركب من جوه بس كركبه قريبه من قلبى , لكن مؤخرا بدأت احس ان الكراكيب دى مش بتاعتى 
انا عارف كراكيبى كويس !! كراكيبى بتفرحنى لما بعدى عليها او افتكرها او اكلم نفسى عنها 
دى مش كراكيبى !!!! هذا ال أنا ليس ب أنا 
مافيش حاجه فى الكون ده بتزعلنى من نفسى الا احساسى انى بظلم حد معايا , يمكن اعدى اى حاجه لنفسى لكن ظلم الناس دى حاجه ممكن تخلينى افضل ليالى صاحى بكلم نفسى 

والمصيبه انى بظلم كل الموجودين فى حياتى دلوقتى بما فيهم نفسى 
بس نفسى متعوده منى على كدا !!!

وصلت لمرحله انى لازم اخد قرار , لازم احط كل حاجه فى مكانها , وارجع كل الكراكيب فى ماكنها عشان افضل أنا بكراكيبى 

من كام سنه ابويا قالى جمله و النهارده بس فهمتها 
كنت بكلمو عن الحب و الجواز و الاستقرار  , و كان حوار مثمر اوى على عكس معظم او كل حواراتى مع ابويا اللى بتدور حوالين البيزنس والبورصه و كل العك المالى ده 

لاقيتو بيقولى " انت هتعيش لوحدك و تموت لوحدك "
قولتلو " انا مش طالبه معايا فلسفه عل اخر الليل " و طبعا كنت فاكره بيهزر 

قالى " انت فاكرنى بهزر , بس انت ابنى و انا اكتر واحد فاهمك
ملامحه كانت بتقول انه بيتكلم بجد 
قالى " انت قلبك عامل زى تمثال معمول من الجليد , شكلو حلو  من بعيد بيخلى اى حد يقرب , بس ساقع لدرجه ان ماحدش ينفع يعيش جواه , ولو حد قرر ياخدو ويطلع بيه بره حدودك الجليد هايسح و ملامحه هتروح " 

من كام يوم لما افتكرت الجمله دى واسقاطها على واقع حياتى , كلمتو وقلتلو , انت طلعت فاهمنى زياده عن اللزوم " و قفلت الخط !!!

الى كل الناس اللى ف حياتى " سامحونى ان كان الامر فى استطاعتكم " 

انا متناقض و سأبقى هكذا لان هكذا يلائمنى تماما 

 انا مش عارف انا ليه بقول الكلام ده ؟ 
جايز عشان قربت اخد قرار انى اقفل المدونه عشان تلحق بأخواتها 

انا دايما كدا , كل فتره بعمل مدونه ارمى فيها شويه كلام و بعدين اقفلها و اقفل الاكونت اللى اتعملت بيه 
وكأنى بمسح تاريخى بمزاجى 
و رغم ذلك هتفضل دى المدونه الاقرب الى قلبى 
عشان قابلت هنا ناس جايز مش هاعرف اقابلهم تانى فى اى عوالم افتراضيه او حتى حقيقيه 

   
 

               

هناك تعليقان (2):

  1. أحمد اولا حمد لله عالسلامة كان بقالك كتير مكتبتش
    ثانيا بقى كون متأكد ان اللي انت فيه ده حالة وهتعدي .. انا بعد حاجات كتير جدا عديت بيها اخر سنتين كده ومازلت اقتنعت ان الحياة دي فترات، فترة تبقى طاير فيها من الفرحة وراضي عن نفسك جدا ومش عايز تسمع اي نقد او حتى رأي وفترة تبقى حزن تبقى مش طايق نفسك فيها وحاسس انك غلط في كل حاجة وتقعد تعيد كلام كل الناس اللي قالوهولك قبل كده واللي مكنتش مقتنع بيه في يوم من الايام وتشوفه صح


    ارضى عن نفسك وعن اللي انت بتعمله طول ما انت مقتنع بيه وان شاء الله زي ما قلتلك فترة وهتعدي واوعى تقفل المدونة اصلا بقى :D
    ربنا يريح بالك ويرشدك للصواب دايما

    ردحذف