بسم
اللله الرحمن الرحيم
احيانا كتير بنحس اننا لوحدنا فى الدنيا دى و
ان مافيش حد فاهمنا ولا حد عارف
يوصل ل قايمة شوية حاجات بتفرحنا لما بتتعمل .
بيقى احساس صعب ورخم وصعب تتغلب علية او بالاحرى مافيش غير طريقة واحدة عشان تخرج
منة . الا وهى ( حلوة الا وهى دى ) ما علينا كنا بنقول اية ؟؟؟؟؟
اة افتكرت .......
لازم تبص للناس اللى حواليك وتحبهم زى مابتحب
نفسك حتى لو هما ماكنوش قد الحب دة بس حبهم وخلاص ومش بقولك خليك عبيط ومغفل . لا
. حبهم صح وخدهم منهم احسن مافيهم و اديهم احسن ما فيك و اتعلم منهم
اة اتعلم منهم . مش عيب على فكرة انك تتعلم
من اصحابك بالعكس دى كل خبرة حياتك هاتتعلمها من اصحابك واصحابك بس كمان و بردو مش
بقولك الغى شخصيتك وقلد اصحابك . لا . خلى عندك كاريزما بتاعتك ليك لواحدك حتى لو
الكاريزما دى مش موجودة عندك . هات ورقة وقلم واكتب كل الحاجات اللى تحب تكون
موجودة فى شخصيتك و اعمل لنفسك دور فى الحياة لازم تعيشة ل سبب واحد بس ........
ان مافيش حد هاينفع يعمل دورك غيرك انت
ابدا تمثل الاول انك خلاص بدات تشرب الشخصية
الجديدة اللى انت خلقتها بس شوية شوية هتلاقى نفسك بقت الشخصية دى بجد ومن غير
تمثيل . انا عارف ان الكلام باين مش منطقى ومايدخلش دماغ طفل فى رابعة حضانة بس لو جربت تعملة هتلاقية فعلا حقيقة وحقيقة
ثابتة كمان .
ساعات الناس بتبقى وحشة و بتبان انها مش
عايزة غير مصلحتها بس . انا و انت عارفين ان ربنا خلقنا بنهتم بمصلحتنا الاول
وبندور عليها فى كل حتة وفى كل وقت ومع اى شخص . لكن لو بصيت بعمق شوية هتلاقى
الناس كلها جواها حاجات كتير حلوة ومش عارفة تخرجها بسبب مبدا غبى اتزرع فينا وهو
اننا بقينا نقارن المشاعر ونقيسها بالكيلو يعنى لو فلان سال عليا مرة و اتنين و
تلاتة ممكن فى المرة الرابعة ارفع علية سماعة تليفون و اسال علية ويااااااااااااة
هاتبقى تقيلة اوى عليا بس هاعملها من باب انى الاقى حد يسال عليا المرة
الخامسة او بالبلدى ( اختشى على دمك اهلك
يابعيد ) . لازم هو يسال الاول وهو يتصل الاول وهو يفتكر الاول و لازم هو يعمل
حاجات كتير حلوة عشان يستاهل عطفى وسوأ لى علية
لالالالا مش كدة خالص ........
الموضوع ابسط من كدة بمراحل . فى كلمة كنت
قريتها فى كتاب بتقول ان ضحكة واحدة منك الصبح فى وش واحد صاحبك بتائثر فى نفسية
عشرة من اصحاب صاحبك دة . تخيل ؟؟؟؟ عشرة
امال لو ضحكت فى وش كل واحد صاحبك هاتعمل اية
؟ دة انت هاتسعد الكرة الارضية كلها و بجد
هاتبقى احلى لو ضحكت فى وشة من قلبك مش من شفايفك . هاتوصل قلبة من غير نقاش
مش لازم تلاقى ناس حلوين حواليك عشان تبقى
حلو . خليك حلو ومالكش دعوة بحد هو وحش ولا لا . هو لية رب يحاسبة بس انت ليك دور
معاة . اضحك فى وشة و حبة و اتعلم منة و خلية يشوف الجزء الحلو اللى فية فى مرايتك
انت و صدقنى هتلاقية بيتغير . لان الاصل والفطرة فينا نضيفة ومافيهاش اى شر لكن
تراكم الاحداث الوحشة ورا بعض بيخلق زى حاجز بينا وبين نفسنا المفطورة على الخير
اسف على لغتى العامية المتواضعة لكن هى جت
كدة والكلام خرج منى كدة ...
شكرا على حسن الاستماع
صيف 2011
5/6/2011
جامدة جدا ولذيذة
ردحذف