و انا مع نفسى قاعد

شهر !!!! شهر ماكتبتش حاجه فى المدونه ؟؟؟؟

سؤال بحاول اجاوب عليه كل يوم بعد يوم دراسى طوييييل , بحاول اجاوب بانى افتح المدونه و افضل متنح فى الصفحه البيضا و مش عارف اكتب ايه !!!!

احساس غريب لما تحس ان الكلام عمال يتنطط جواك عايز يخرج باى طريقه و انا مصر انى ماكتبش مع انى كنت هاموت و اكتب 

هى حقيقه و لازم اعترف بيها , لقد تحولت من مجرد كاتب هاوى , الى رجل الكتابه هى مهنته

لم ادرك يوما حقيقه توابع تلك المهنه , لكننى منذ شهور بدأت ادرك كم هى مهنه مرهقه

كم هى شاقه !!! 

الضغط العصبى الشنيع اللى بيجيب صداع بقى العادى بتاعى 

عمر طاهر قالى قبل كدا " لو قررت تبقى كاتب او صحفى لازم تعمل حسابك انك هتحرق 3 حاجات

اعصابك و قهوتك و سجاريك " 

يومها عملت نفسى منصت بس كنت من جوايا فاكرو بيرسمهم عليا بس لما اشتغلت فهمت ان دى الحقيقه المجرده من اى حاجه 

سلوكى تجاه معظم الناس حواليا بدء يتغير تدريجيا , ناس كتير ابتدت تحس انى بتغير عليهم و انى مابقتش احمد بتاع زمان

اصحابى لسا مش قادرين يفهموا انى دلوقتى ممكن افضل قاعد متنح لمده اربع خمس ساعات فى ورقه فاضيه و بحرق فى قهوه بس 

لسه مش عارف اقتنع انى مطلوب منى السنه دى انجح من اول مره و دى حاجه عمرى ما عملتها من يوم ما دخلت الكليه و ده عاملى ضغط عصبى بردو

انا بحاول و ربنا يستر 

صحيح انا اخدت خطوه على الطريق الصح , الطريق اللى كان نفسى امشى فيه من زمان , صحيح الخطوه جت متأخره بس انا مصدق ان كل حاجه دايما بتيجى فى وقتها 

صحيح " مصر " مش هتقدر تفهم ان اللى بينا انتهى خلاص و لهذا السبب بطلت العب سياسه بكل اشكالها  وتحولت من شخص ثورى من الطراز الاول و واحد من مصابى الثوره الى شخص حزب كنبه من الطراز الرفيع بل انى قربت اشك انى جاسوس اصلا مش مصرى 

حتى " هى " بقت تفهمنى مره صح و مرات غلط , الحق دايما مش عليها , الحق عليا لانى طول عمرى ما بعرفش اشرح كويس 

الحق مش عليها دايما , الحق على دمى التقيل و شخصيتى الرخمه فى كل اطاورها بس الموضوع خرج من ايدى خلاص , انا كدا و كدا يناسبنى جدا 

الحق مش عليها دايما , الحق على غبائى اللى مقدرش يتفهم معانى كلامها و ما وراء المعانى 

و ليكن عزائك فى انكى تحبين هذا المجنون و ان هذا المجنون يحبك و يحب حبك له 

احساس نادر لما تحس انك بتكبر , انك بتتطور , انك بتعمل حاجه , جزء من الشعور مؤلم و جزء منه لطيف انا بقى واقف فى الشعور الوسطانى بين الالم و اللطافه , 

 " الحب لا يُهزم " جابريال جارسيا ماركيز 

عبقريه الراجل ده فى شخصياتو اللى بيرسمها ببراعه منقطعه النظير , مستحيل تعدى على روايات الراجل ده من غير ما تحس بنفسك واحد من ابطالو , هو متميز اوى فى النقطه دى  

ماركيز بالنسبه ليا رسام اكتر منه روائى 

ولأنى رجل لا يمنح لقب " رسام " بالساهل , فاحب اوجه رساله للاستاذ ماركيز انه كدا دخل التاريخ " التواضع ده هو اللى مودينى فى داهيه " 

بعيدا عن كل حاجه بتحصل فى البلد و اللى بحاول بكل الطرق انى انسلخ من كل الحوادث اللى بتمر بيها مصر , الا اننى مدرك انها لحظه و هتعدى , لحظه ممكن تستمر لشهور لسنين لكنها فى النهايه لحظه 

" تعرفى يا مصر , انا بقيت بحبك كأنك مرات ابويا , لو عليا اضربك بالنار لكن بخاف على زعل ابويا " علاقتنا اتوترت اوى يا مصر , بس انتى اللى علمتى كدا فينا 

زمان كان ممكن اديكى روحى و كنت هابقى مبسوط و دلوقتى مابقتش عارف حتى اديكى ودانى و ااسمعك

فى يوم هتفهمى ان انا واللى زى حالاتى حبناكى اكتر من حد اى فى الدنيا بس انتى طول عمرك كدا , بتحبى اللى بيكرهك , 

للاسف احنا مش لبعض يا مصر , لا انا هاعرف اكرهك ولا انتى هتعرفى تحبينى و من هنا و رايح هابطل اقول " مصر هى امى " هاقول " تركيا هى امى " ايوا تركيا يا مصر 

تركيا اللى فضلت مخبيه عليا انها امى طول المده اللى فاتت دى عشان ماتجرحش مشاعيرى

انا كدا خلاص خلصت و فرغت شحنه الكتابه اللى كانت جوايا 

و الشتا وصل بالسلامه الحمد لله بعد طول انتظار 

و اختى لسا بتشرب النسكافيه بتاعى و تقولى ما شربتش حاجه . و النسكافيه بيخلص لوحدو و اللذيذ انى لسا بصدقها 

الى كل الماره فوق تلك الحروف , اسف على الصداع 

احمد الجمال 

مطلع شتاء 2012

من رسائل الحب والاسف ...

 اننى لا اجيد الاختباء ولا اجيد الانتظار الطويل ولا طاقه لدى لأحتمال تباطئ دقات عقارب الساعات

انت تعلم يا عزيز , انت تعلم ذلك عنى 

سامحنى و سامحى فجاجتى العاطفيه التى طرحت كبريائك العربى ارضا و مزقت ما تبقى من قطع صحيحه فى قلبك وغير مشروخه

بالنيابه عن كل النساء الباريسيات اعتذر لك و ارسل كل ما تبقى لدى من قبلات الى جبهتك المورده بحمره لقاءنا الاول 

و ليشهد يسوع ان رجلا قبلك لم يعطنى هذا الحب ولا هذا القدر الفائق من الحنان و لكن انت تعرف يا عزيز ان النساء طبعها غادر تماما كالقطط فهى ناعمه الملمس و حاده الاظافر فى نفس الوقت

انت لم تخطئ و انا لا ارانى اخطئت وانما اخطئ الزمن فى ترتيب لقاءنا فما كان من المفترض ان نلتقى مذ التقينا و انما كان لزاما علينا الالتقاء فى عصور قديمه بقدم جدران الاهرامات و المعابد فى بلادك و بقدم لوحات الشانزليزه وقوس النصر فى بلادى

ولا اعتقد ان ملامحك ستمحى من قلبى عن قريب فقد اصبحت شديده الشبه بك حد الالتباس فى امرى و انا انتصب امام مرءاتى فلا اعرفنى منك ولا اراك بوضوح منى 

لقد امتزجنا حد استحاله الفصل فأصبح كلانا لايعرف نفسه الا باللأخر

اكرر اسفى يا عزيز الاعزاء 

سأكتفى برفات رسائلك و بقايا ايام سوف لن تُنسى و لحظات حُفرت على جدارن قلبى البارد

سامحنى لاننى لم اعترف لك منذ لقاءنا اننى اعرف انه لايتبقى لى على هذا الكوكب سوى شهور قليله هى عمر حبا لم اتصوره سيحدث بيننا

وعلى الشاطئ الاخر من الابديه سوف انتظرك لتعوضنى عن ايام وليالى قضيتها بمفردى داخل قبرى الذى تفوح منه رائحه النعناع البرى الذى اوصيت ان يُزرع امام شاهد قبرى

مع حبى الابدى ...

.

من رسائل امراه باريسيه الى رجل عربى ارهقه الترحال بين شواطئ العالم و موانى النساء 

احمد الجمال  ...

these words written under the inspiration of Adele "make you fell my love " and i`m grateful for her and the words either

اليكى وحدك .....

اليكى تحركت مشاعرى دونما بوصله و ودنما اتجاه و فقط تحركت لتبقى بقربك زمنا لا تسعى الساعات ان تحصده او تتبع دقائقه 

اليكى تحرك الكلام بداخلى فتحرك قلمى رغما عنه وكتب اليكى حروفا لم يتعلمها بعد ولا يفهم محتواها لكن كتبها من اجل ان يرى النور من عيناك التى ترقص فرحا لحروفى البلهاء المتراصه بجانب بعضها البعض 

لا داعى للمقدمات فأنتى تعرفيننى جيدا , لا اجيد هذا الفن و لا انوى ذلك 

كونى حذره فى قراءه التالى فهى كتله من المشاعر  المتراصه التى لا يربطها اطار زمنى واحد فبعضها حدث اليوم وبعضها الاخر حدث منذ اسابيع 

كونى حذره فمشاعرى وعره جدا و طرقى موحشه و انتى من تعلمت على يداكى البراءه ان تصبح ما هى عليه الان 

منذ اكتر من عشره ايام كنت فى طريقى الى مكان ما لا اتذكره و الطريق مزدحم حد الانتحار و درجه الحراره خانقه والمصريين اغبياء كما هم و انا كعادتى لا اعطى ( تبا ) لكل هذا الهرى المفرط  
اخذت اتابع حركه الطريق الذى لا يتحرك تقريبا و انا من وراء زجاج التاكسى و الموسيقى تسرى من سماعه هاتفى الى اذنى مباشره دون ادنى احتمال للخطاء , والهواء البارد يلف السياره من الداخل لكننى ارى العرق يملئ الوجوة بالخارج و الكل يتأفف 

مرت بجوار نافذتى سياره اخرى و من وراء زجاج اخر رايت فتاه تنظر فى اتجاهى , تعجبت من تلك النظره الثاقبه لكن سرعان ما ادركت انها لاتنظر الى و لا تنظر الى شئ  انها ليست على كوكب الارض من الاساس انها فى هذا البعيد الكامن وراء اللاشئ تنظر او تنتظر شئيا ما لا ادركه وبالصدفه وقعت انا فى مجال عيناها وظللت محدقه داخل عيناى تحركت سيارتها وهى مازلت تنظر فى نفس الاتجاه , انها خارج الوعى من الاساس 

و وصلت الى المكان الذى لا اذكره ولكننى اذكر اننى عاهدت نفسى على ان لا احملق مره اخرى فى عيناى الاشخاص حينما يسرحون بعيدا , فأنا كائن متطفل صحيح لكن يابخت من زار وخفف يعنى 

اما النهارده بقى فهو واحد من اعجب الايام التى قد يحيها بنى ادم زى 
استيقظت متأخرا نظرا لارهاق عجيب اصابنى بالامس , فضاعت المحاضره الاولى ,قولت مش مهم , نحضر التانيه وركبت المترو و الدنيا فضلت ماشيه زى الفل لحد ما جيه الشيطان ابن الحرام و قالى ما تنزل محطه السيده و تاخد جوله هناك بما ان لسه بدى على الماحضره التانيه 
وكالعاده سمعت كلامه ( انا اصلا معنديش شخصيه ) ماعلينا و نزلت فى مترو السيده وفضلت ماشى على امل ان افهم انا فين او انا رايح فين !! بس الحقيقه انى معرفتش حاجه وفضلت عمال اسأل  فى خلق الله كلهم وكل واحد يدينى وصفه شكل وانا مع كل وصفه وكل فتيه الصداع يزيد اكتر 

قولت لنفسى انا مش هاعكر مزاجى , روحت على اقرب واحد بتاع عصير قصب و خبطت واحد عصير قصب وبعدين خبطت واحد تانى نظرا للطفاسه المفرطه و لانى لقيت المحل مش عليه زباين كتير فقولت انفع الراجل بقى , وفرحت جدا لما دخلت واحده شربت مانجا وانا بشرب تانى كوبايه قصب , وقولت لنفسى انى وشى حلو على الراجل و ده حسنلى مزاجى بعض الشئ 

و انطلقت فى رحله البحث عن اى حاجه تودينى الكليه و مالقيتش و اكتشفت انى واقف فى الاتجاه الغلط اصلا هههههههههه منتهى الغباوه يعنى !!!

فقررت انى استخدم كلمه السر السحريه اللى بتحل اى ازمه مروريه عويصه 
تاكسييييي!!!!

و رغم الظروف الماديه المهببه الحمد لله , اخدت المغامره و ركبت التاكسى و ياريتنى ما ركبتو , الدنيا زخمه لدرجه انى وصلت بعد المحاضره التالته اللى انا اصلا كان المفروض اروح احضر التانيه 

كوميديا مروريه , اه والنعمه 

وباظ اليوم الدراسى , لكن كل ده مأثرش عليا اطلاقا 

بعدها جالى تليفون انى عندى ميتنج مهم فشخ و انا ناسى خالص , روحت  متأخر نص ساعه , مش دى النقطه , لاقيت نفسى رايح مــــتأخر على ناس مهمين اوى اوى فى البلد دى 
تلاته من اشهر منظمى الحفلات فى مصر , منظم حفلات عمرو دياب و منظم حفلات حماقى و منظمه حفلات شيرين 
و اكتشفت بالصدفه بردو انى كان لازم اروح فورمال , ماجتش على دى اللى نسيتها يعنى 

المهم لاقيتنى مش مهتم بالكلام معاهم فسيبتهم يرغوا  و بمنتهى الجليطه طلبت موكا ساقعه بالبندق و حتى من غير ما اشوف اى بشري منهم يشرب ايه , طبعا مديرى نازل غمز وتبريئ بعينه وانا ولا هنا 
وخلص الاجتماع مع الشخصيات اللاوزعيه دى ومشيوا وطبعا خدوا عنى خلفيه زى الزفت بس فااااكس  يعنى !! من امتى بهتم 

بعدها اكتشفت بالصدفه بردو انى معزوم على حلفه مهمه جدا عشان سفير مصر فى اسبانيا عمل كتاب , بردو مش دى النقطه , دخلت قاعه عملاقه كدا وكنت مميز بشكل مش طبيعى مش لانى وسيم فشخ او كيوت اخر حاجه ( اللهم زدنى تواضعا ) بس لان كل البشر اللى هناك لابسين بدل فورمال وانا رايح بتيشرت نبيتى فاقع وجينز ارزق وشنطه كروس !!! القاعه كلها كانت بتتفرج عليا وانا ماشى بالسماعه فى ودانى ومش عارف ولا حد من الناس اللى اشكالها بتقول انهم ناس كبيرا اى فى البلد دى 

بعد كدا خدونى على واحد شكلو مهم اوى وكل الناس ملمومه حواليه وبعدين قالولى ده سياده السفير بصلى كدا من اى تكلف فسلمت عليه وقولتله احمد الجمال لاقيته بصلى وضحك كدا وقالى تشرفنا يا احمد بك !!!!!!!!!
فتحت انا بقى بقى !! وقولت فى سرى بك مين يابرنس؟؟؟ انت بتكلمنى انا طيب ؟؟ظ 
فلاقتنى ببتسم فى وشو وبهز دماغى ببلاهه كدا ومش عارف اقولو ايه لحد ماجت واحده فضلت ترغى اسبانى كتير وانا منشكح جدا عشان مش فاهم اى حاجه وسيبتهم ومشيت وقولت اعمل حاجه مفيده فى ام اليوم العجيب ده 

روحت على البوفيه , لاقيتنى بردو مش فاهم ولا صنف هناك , قةلت فى نفسى وبعدين فى اليوم العالمى لل مش فاهم اى حاجه فى اى حاجه ده ؟؟؟ وبعدين لاقيت منتج عجيب كدا انا بشبه عليه فسئلت الشيف ايه ده ؟؟؟ 
قعد يقولى كلام كتير ما لقطتش منه غير كلمه مدخن قولت بس خلاص طالما مدخن يبقى امان وروحت واخد منو وبعد ما خلصت اكل اكتشفت انى كنت الوحيد اللى واقف بياكل فى القاعه !!!!  

قولت خلاص كفايا كدا كفى الله المؤمنين شر القتال , نروح بقى 
وباخر خمسه جنيه فى جيبى روحت , بس بعيدا عن اى حاجه ان حاسس ان اليوم كان مبسوط اوى فحالو يبسطنى معاه وانا تفاعلت معاه بشكل او بأخر 

شكرا لكل حاجه حصلت النهارده , شكرا لأكتر واحده صرفت مصروف الشهر بتاعها كلو فى سيلنترو عشان انا مفلس 
شكرا لحاجات كتير بس الشكر الاكبر ليكى لانه برغم كميه العك اللى حصلتلى الناهرده كنت مبسوط انه هايبقى عنده ماده خام لحدوته احكيهالك لما اشوفك :)

بس خلاص ......

احمد الجمال .

 

هلاوس سريعه

هو العادى انى بكتب من فتره للتانيه , حيث لا تتعدى مده هجرى للمدونه اكتر من اسبوع عشان المدونه بتقفش و بتزعل و بتعمل حركات مش لذيذه ابدا 
بس فى كل مره بتأخر عليها و اجع اقولها متزعليش عشان انتى عارفه انا مشغول اد ايه 
يا عزيزتى كليتى مش بترحم الطلاب اللى فيها 
يا عزيزتى شغلى مرهق جدا وانتى عارفه كدا بردو 
يا عزيزتى انا اسف .....

وبرغم كل حاجه ببذل مجهود ضخم عشان اعمل حاجتين مهمين اوى 
اولهم انى اقلل من كميه الوقت اللى تبضيع فى حاجات مالهاش لازمه و ده نظريا ممكن لكن عمليا مستحيل ,  لان الانسان المصرى بيعشق حاجه تضييع الوقت او يمكن احنا طلعنا فى مجتمع مش بيقدر قيمه الوقت 
فبلاقينى فى اخر كل يوم ضيعن حبه وقت محترمين 

اما الحاجه التانيه اللى بحاول اعملها هى انى الاقى وقت لنفسى , اخرج شويه مع اصحابى , اقعد على القهوه و نرغى و اسمع منهم عن مشاكلهم العاطفيه و اشرب عصير اللمون المفضل بتاعى وانا بسمعهم 

عايز اكمل الكام روايه اللى بقراهم 
احدى عشر دقيقه لباولو كويلو 
تانجو و موال ل مى خالد 

عايز الاقى وقت اذاكر عدل بدل شغل التخطيف ده , والله الواحد عايز يذاكر بس النفس بقى D:

عايز اكتب كام سطر محترمين ف احس انى لسه بعرف اكتب بشكل محترف بدل النكش اللى انا بكتبه ده 

عايز ارجع البيت كل يوم قبل الساعه 8 عشان الحق مسلسل نزار قبانى 

عايز اتفرج على فيلم حلو يبهرنى كدا ويخلينى اطلع بفكره جديده اكتب عنها , يا مسهل , انا كارنينا قرب ينزل مصر , وهو ده املى الوحيد اليومين دول فى فيلم محترم 

عايز اعمل حاجه تفرح الناس اللى بحبهم كلهم مره واحده !! مش اجيب كل واح و اقعد افرحو لوحدو !! فاضى انا ؟؟؟ ممكن اعمل ايفنت على الفيس بوك و اعزمهم كلهم D:

عايز اشترى منبه مزعج و رخم و غتيت عشان يعرف يصحينى الصبح بدل المنبه المايص بتاع الموبايل و يكون حديد عشان مايحصلش اخوه اللى اتكسر و انا بسكته 

عايز الشتا يجي عشان الجواكت بتاعتى وحشتنى و الايس كاب الصوف صديق الكفاح الشتوى وحشنى بردو 

عايز اجيب هدايا للناس اللى بحبهم من غير مناسبه تستدعى هديه , رغم انى عارف انى ضعيف جدا فى موضوع الاجتماعيات السخيفه دى 

بس دى مش اجتماعيات دى مشاعر حب خالصه , ايوا انا بحبهم فعايز اعبرلهم عن حبى ده , فى حاجه دى ؟؟؟!! لا طبعا :)

عايز اقابل انيس منصور و اقوله انو وحشنى جدا و ان العمود بتاعه فى الاهرام وحشنى اكتر و مع اقتراب ذكرى وفاته بيوحشنى اكتر و اكتر 

عايز اشرب فنجان قهوه محترم و حط 35 مليون خط تحت محترم دى 

فنجان  القهوه بقى زى الحب , عمله نادره !!

" احبك جدا واعرف انى  اسافر فى بحر عينيكى دون يقينى " كاظم الساهر 

عجبتنى وانا بسمعها فقولت اكتبها  هنا كنوع من التوثيق العاطفى لمشاعرى فى تلك اللحظه اللى انا قاعد فيها فى صوفى و الكوبايه اللى كان فيها كوكاكولا قاعده بتتفرج عليا من بدرى 

 عايز اعمل حاجات كتير اوى بس محتاج زقه صغيره , جست زقه تخلينى احس بأن المتعه مازلت موجوده فى مكان ما فى هذا العالم 
 
هى موجوده بس التزامتنا  بروتينها الغبى بتخلينا ننسى اننا عايشين عشان نعمل حاجه بنحبها و بيضحكو علينا ويقولو حب ما تعمل حتى تعمل ما تحب !!!!!!

قالك !!!! 

ماعلينا , المهم انى كويس و صحتى تمام الحمد لله و معايا فلوس تمشينى و عندى بنت زى القمر بتحبنى بدون اسباب رغم كل حماقاتى و اصحابى بيحبونى و موجودين فى حياتى الحمد لله 
اذا كل حاجه تمام و زى الفل و اللى مش تمام دلوقتى هايبقى تمام كمان شويه المهم انه هايبقى تمام وخلاص 

كلمه قالهالى واحد حكيم قابلته مره على القهوه 

 " اللى اهم من وقوع المصايب هو الاستعداد لوقوع المصايب " كم انت جامد فشخ يا ايها البنى ادم اللى معرفش عنك حاجه 

اراكم قريبا .....
احمد الجمال 
صوفى بوك ستور 

العوده الى الزفت

من ارخم الفترات اللى بتعدى عليا كل سنه 
دخول المدارس والجامعات 
فتره بتمنى انها تتمسح من السنه بأستيكه من كتر ما انا بكرهها 
عمرى ماكنت بحب المدرسه , كنت بقوم كل يوم بضرب الجزمه مع انى بصحى بدرى بس فى الاجازه بس انما فى الدراسه ببقى نفسى اصحى العصر كل يوم عشان اليوم الدراسى يفوتنى و اغيب 

يمكن لسه مش عارف اوصل للسبب فى كرهى الغريب للدراسه على الرغم من انى المفروض طالب دحيح من الللى دخلو هندسه بمجموع كبير فى ثانويه عامه 

حتى فى الكليه بتبقى اسعد فترات حياتى لما انزل الكليه بس اعمل اى حاجه غير انى احضر السكاشن والمحاضرات 

السينما ليها طعم تانى لما تنفض للمحاضره التانيه و تنزل على السينما 
وبعد السينما تخبط اتنين فول من عند جاد , يااااااااااه الدنيا و ما فيها 

الاجمل بقى اننا بنبقى فى الشتا فالشوارع بتاعت وسط البلد بيبقى ليها طعم تانى مختلف عن طعم الصيف الخنيق وفى اخر اليوم اللى المفروض انه يوم دراسى تنزل على كليتك تمضى انصراف و تصور المحاضرات الللى هما خدوها وبعدين تروح منتعش 

منتهى الاحساس بالسعاده و الفشل فى آن واحد 

المهم بقى اننا راجعين الدراسه بعد بكره و ده عاملى دوشه فى دماغى لعده اسباب 

اهمها اننا لسه فى الصيف و ان السينما مافيهاش افلام حلوه و ان الفيلم بتاع كيرا ناتلى لسه مش عارف هاينزل امتى و ان السنه دى مخصوص فى ناس هاتتدحل و بقوه عشان تمنع المهزله اللى كانت بتحصل كل سنه دى 

غير هذا و ذاك انى من جوايا عايز اخلص الكليه بقى , خلاص زهقت منها اصلى بقالى كتير اوى فيها , كبير انا على المرمطه دى اصلا بس اعمل ايه ؟ 

المهم انى بردو بكره اليومين دول اللى المكتبات بتتزحم فيهم زحمه غريبه لدرجه انى بفكر افتح مكتبه الكام يوم دول وبعدين اقفلها تانى 

و اللى يشوف الواد من دول وهو خارب بيت ابوه كراريس وكشاكيل يقول ان الواد هايطلع الاول على الجمهوريه وفى الاخر بيدخل تجاره انتساب اسيوط 

يمكن الغلط فى المنظومه الغبيه اللى بتخلى الشاب من دول يقضى اكتر من تلت عمره داخل اسوار المدارس والجامعات على فرض ان متوسط عمر الانسان 70 سنه 

انهى منطق يقول الخرافات دى ؟؟؟ وياريت بعد كل ده هاتخرج تشتغل بشهادتك او هاتشتغل حاجه بتحبها 
ابقى قابلنى , هاتخرج تلاقى مثل متخلف بردو بيقولك اشتغل اى حاجه على ماتفرج وابقى اشتغل اللى تحبو لما تاخد خبره 
وتفضل طول عمرك تشتغل حمار فى ساقيه على ماتفرج و بالطبع لو فكرت تتجوز ده هايبقى من دروب الكفر 
ضيق الحال من ناحيه و ضغط اهل العروسه من ناحيه تانيه لحد ماتخرج عن شعورك و تروح تنتحر و اعتقد انى سمعت عن رقم محترم من الانتحارات فى مصر نتيجه احساس بالعجز قصاد كل حاجه 

هى قلبت غم كدا ليه ؟؟ 

ماعلينا المهم انى هحاول استمتع بالكليه السنه دى و ابقى طالب مجتهد وانجح بمواد بس , مش لازم يعنى اعيد السنه و اهو كلو زكاه عن صحتى D:

لسه واخد بالى امبارح بس انى بحب فيلم السلم والتعبان اوى بحسه فيلم فلسفى اوى رغم انى مابحبش مياصه هانى سلامه بس بلاقينى مضطر استحمله عشان فكره الفيلم عاجبانى و الاهم من كدا انى بقيت اعرف ان طارق العريان هو المخرج من قبل ما اشوف التتر , من كتر كميه الاعلانات اللى بيحشى بيها افلامه , ده حتى كليبات اصاله مؤخرا بقت كلها اعلانات , مش ليه بحسه كان نفسه يطلع مخرج اعلانات بس فشل وطلع مخرج افلام D:

وبس خلاص 

الصوره اللى فوق دى هى االايموشن الرسمى بتاعى فى صباح كل يوم دراسى لعين 

من غير مناسبه

من غير مناسبه قررت اكتب هنا على طول من غير ما اكتب فى ملف ورد وبعدين انقل الكلام هنا والحقيقه انى مش عارف السبب فى كدا ايه ؟!

من غير مناسبه حبيت اعترف انى ماهما حاولت اكون اجتماعى هافشل فقررت اتماشى مع الامر واعترف انى مش اجتماعى الا فى حالات الضروره القسوى اللى هى الشغل فقط 

من غير مناسبه حبيت اقول لكل بنى ادم او بنى ادمه فى حياتهم حب يحافظوا عليه , مش بالضروره حاله الحب المتعارف عليها بين ولد وبنت 

وانما حاله الحب الكبير حب العيله بافرادها كلهم اللى احيانا بنحس بتسلطهم المبالغ فيه وحشريتهم الزياده فى حياتنا الخاصه وحتى اضيق مساحات خصوصيتنا بيقتحموها بمنتهى العنف بدافع الحب والخوف ولازم نقدر خوفهم علينا 

حاله الحب بين الاصحاب اللى المفروض انهم بيحبوا بعض بدون مقابل و بردو رغم حالات الخناق والقفش الكتير اللى بتحصل بين الاصحاب واللى غالبا بتكون بسبب اختلاف فى وجهات النظر والتمسك بالدفاع عن تلك الوجهه بعنفوان شبابى

ايه اللى انا بقوله ده ؟؟؟ مش عارف ليه قررت اقول كدا او لمين بوجه الكلمات دى بس اهى شحنه وكان لازم تخرج فى اى حد وخلاص 

بس بردو مازلت مصر على وجهة نظرى بان واجب على كل حد بيحب ياخد بالو من الناس اللى بيحبهم اوى , لانى ببساطه اكتشفت ان الحب هو اصل الاشياء , كل الاشياء مهما اختلف منبعها ومهما اختلفت طريقه نهايتها فى هاتببدأ بالحب 

و رغم اننا فى مجتمع بيقبل الحب بس على مزاجو , يعنى بيقبل الحب على طريقه التقاليد , وايه هى التقاليد ؟؟؟
مش عارف , بس غالبا هى شويه قواعد حطها شويه اشخاص فى زمن بعيد اوى عن الزمن اللى احنا عايشين فيه ده ومش عارف ايه ظروفهم ساعتها اللى دفعتهم لوضع تلك القواعد الا انهم حطوها والزمونا بيها بالتدريج لحد ما بقت قانون لا يقبل النقاش 
او مجرد النقاش فيه حيود و فجور و خروج عن المألوف والمعروف و المعتاد ,

عانت العقول العربيه كثيرا من تلك الازدواجيه فى التفكير اللى تقود معظمنا الى طرق لا تنتهى من التفكير و التفكير فى حلول لهذا المأزق الذى لا بد من الخروج منه الى عالم جديد لا يضع عوائق امام الفكر او يرصد اشخاص لامهنه لهم الا شرطيو افكار 

لقد عجزوا عن الحب فتمحور العجز عن الحب الى مقدره رهيبه الى دفع اى محاوله لتجديد هذا الحب وبالتدريج اصبحوا لا يطاقون ولما احسوا بمرضهم قرروا ان يفشوا هذا المرض فى باقى المجتمع حتى لا يشعروا بالغربه 

فخرج لنا جيل من الاباء والاجداد يأخذون من امثال عقيمه ك" ابعد عن الشر وغنيلوا وامشى جنب الحيط " نبراسا لطريقه تفكير وتربيه لابنأهم 

وبعدين طيب ؟؟؟ انا عايز حد يقولى اسكت 
طيب ايه اللى يمنعنى من انى ادوس على علامه الغلط اللذيذه اللى فى اول الصفحه فوق من على اليمين ؟؟؟ 
مش عارف بس هى رغبه فى حاجه انا مش عارفها 
رغبه وخلاص , رغبه مجهوله مخلاينى مكمل عشان اكتب النحكشه دى وبدون مبرر 

وبعدين تليفونى بقى بيرن كتير اوى بارقام غريبه و كل اما ارد ماحدش يرد عليا 
ويكأننى بتزاول !!! 
انا غلطان اصلا انى رديت !! بس المشكله انها احيانا بتطلع حاجات مهمه فعلا 
ماعلينا !! مش مشكلتكو دى اصلا 

سر جديد وفظيع اكتشفته مؤخرا ان كل العيال الصغيره بيعشقوا الشاى باللبن 
ايه السر فى كده ؟ مش عارف بردو 
انا ملاحظ انى بقيت بقول مش عارف كتييييييييييير اوى اليومين دول و ده مؤشر كويس ان مستوى معارفى بدء يرتفع لتحت !!! 

و اكتشفت ان الكلب بتاعى وحشنى اوى , انا عارف انه فى مكان ما عايش حياته كما ينبغى واكيد زمانه اتعرف على كلبه لطيفه بيقضى معاها وقتو وغالبا هاتكون جابتلو الذريه الصالحه , عارفك سيس و زمانك هتسميهم اسامى غير اللى كنا متفقين عليها بس هاعذرك عشان زمان المدام شخصيتها قويه وهى اللى اختارت الاسامى 

كفايه كدا رغى بقى 

(^_^)
 

بوست فاضى خالص

لو لم يكن الحديث فى استطاعتك فدع الصور تتحدث فهى تعرف كيف تقول الحقيقه 

اكتشفت النهارده اننا بناخد قرارات كتير فى حياتنا بس مش بنعملها عشان بناخدها فى وقت غلط او يمكن بناخدها باحساس غلط او مش هو الاحساس المطلوب 

اكتشفت ان القرار الحقيقى اللى بناخد من بعده خطوه بجد بيقى قرار هادى جدا بتاخده وانت هادى مش وانت مبسوط اوى ومش وانت زعلان اوى 

حاله من السلام الداخلى بتخليك القرار يعدى على مخك لمده ثانيه بعدها بتلاقى نفسك ضحكت وقولت جوه نفسك " انا هاعمل كذا " 

بس خلاص 

شكرا اصاله :)) 

ساعدتنى كتير اوى انى اخد القرار الصح او الاصح فى حياتى على الاطلاق 

" يادوب حلمى أنا أنى اشوف الضحكه فى عنيكى " .

الجمله دى اصاله لخصت بيها المحتوى الحرفى لحياتى .

انا حبك , اصاله 2012 

http://www.youtube.com/watch?v=Qdj_0hJLoXo 


 enjoy it as much as you can 


 

 

انا معترف

خلينى اعترف بقى ان موود الكتابه مش بيجى بالسهل 
لازم تطلع عين اهلى عشان اعرف اكتب سطر محترم ينفع يتقرى 
بس عشان اكون واقعى بردو فى شويه حاجات كده بتحطنى فى الموود لو كان توقيتها صح 

العنصر الاول والاكثر اهميه !!! انى اكون قريت روايه جامده فشخ تخلينى عمال اتشقلب جوه دماغى و بعد " سبتمبر و رغم الفراق " انا مادخلتش فى الموود ده خالص 

بالعكس فى روايات تقراها تحس انك نفسك ترجع جاهل ومبتعرفش تكتب او تقرا من كتر ما هى مبتذله وسخيفه و تسد النفس D: 

بس الكيف سلطان و بيزل يعنى !!! D: 

الحاجه التانيه و هى مهمه بردو  انك تحس المزيكا هى اللى بتسمعك مش انت اللى بتسمعها و دى حاجه مهمه جدا بالنسبه ليا !!! 

يعنى لو حسيت انى انا اللى بكلم المزيكا هتلاقينى بكتب حلو اوى 

و مؤخا طلع اختراع عجيب كده اسمه ask.fm
البتاع على قد ماهو فضوحى وبيقول بلاوى الا انه عرف يدخلنى فى الموود لانى ببساطه اكتشفت ان الناس بتجاوب بصراحه لو ماكنتش عارفه مين بيسألها 

فكره ان تحكى لحد غريب انت متعرفوش شكلها طلعت بتريح جامد 

المهم انى فضلت اتشقلب عند العيال اصحابى و اصحاب اصحابى , ولقيتنى مهتم اوى بحياه ناس معرفهومش 

الحاله دى خلتنى عايز اكتب عن الناس , بيحسوا ايه ؟!! بيبحوا مين ؟؟ بيكرهوا مين ؟؟ بيخافوا من ايه ؟؟ نفسهم فى ايه ؟؟!!! 

ولاقيت نفسى عمال اسال الناس ومش جايلى قلب اعمل اكونت واسيب الناس تسئلنى عشان انا عارف انى رخم وممل و ردودى سخيفه شبهى وفضلت كدا لحد ما عيل منا اصحابى قفشنى وعرف ان انا اللى بسئل 

وقالى طب ماتعمل اكونت وتورينا شجاعتك !!! فضلت اسوف فيه طبعا لحد ما بقينا بعد الفجر و الرجل بقت خفيفه على النت وبعدين عملت اكونت D:ناصح انا D:

و اكتشفت وانا بعمل كدا , حاجه خطيره جدا فى شخصيتى 
ما بحبش حد يسالنى او يمكن مش متعود عشان متعود انا اللى بسأل بحكم الشغل والعاده و كل حاجه , انا اللى بسأل دايما 

لكنى قررت اعترف بالنقطه دى فى شخصيتى عشان اعريها تمام على امل انها تختفى او تتحسن فى شخصيتى و مابقاش ممل D: و ده احتمال صعب !!!:))

المهم بقى , داهون الاكونت بتاعى 
واللى عايز يسأل , يتفضل يسأل و امرى لله :)

http://ask.fm/AhmedElgammal

و كل سنه وانتو طيبين :))
 

زحمه فكريه

زحمه فكريه و اختناق فى حركه المرور داخل عقلى والاشارات المروريه كلها عطلانه والناس بتعدى الطريق مع العربيات فى نفس الوقت والموتوسيكلات بتمشى على خطوط عبور المشاه و الحاله صعبه جدا فى الطريق المؤديه الى عقلى و الموقف سيزداد سوءا مع اقتراب ساعات الذروه المروريه !!! 
وفى وسط الزحمه دى كلها بتلطع سيلين ديون بجمله بتخلينى اقف كتير وافكر 

where is my heart beat now??? where is the sound ??that only echoes through the night 

بصراحه انا ماعرفتش ارد عليها اقولها !! هى دايما كده بتسالنى اسئله صعبه والغريب ان الاغنيه دى قديمه بشكل مش طبيعى دى من سنه 90 و من بدايات سيلين ديون الحقيقيه وبردو مش عارف ايع اللى فكرنى بالاغنيه دى ؟ يمكن هو نصيب افتكرها عشان الاقى السؤال ده و اكتشف انى ما بعرفش اجاوب على سيلين 

 وبعد الدربكه دى كلها , الحمد لله الزحمه اختفت و كانت الاجابه بردو فى صوت سيلين و منظر القطر وهو بيتحرك على القضبان من غير ما يبص يشوف مين وقع منه او مين مالحقوش , هو ماشى بمبدأ واحد لو انت عايزنى يبقى هاتستنانى وتركب معايا !! ولو انت مش عايزنى ممكن تنزل فى اى محطه و انا مش هامسك فيك !!!

متصالح مع نفسه اوى القطر !!! عشان كده كل الناس بتحترمه وتحترم مواعيد واللى مش بيحترمه هو كمان مش بيحترمه وبيمشى من غيره !! 

لما سمعت سيلين و شوفت القطر وسمعته وهو بيطحن المسافات تحت العجل بتاعه عرفت ان لكل حاجه نهايه !! كل حاجه بتخلص !! الزعل بيخلص والفرح بردو بيخلص وكل واحد فيهم بيسيب علامه فينا 

الحزن بيسيب اثار دموع نشفت على وشوشنا وحواجب مقفوله 
والفرح بيسب بقايا ابتسامه وعيون بتلمع 

وانا فين من كل ده ؟؟ انا الراوى , انا دايما الراوى و ده احسن دور بعرف العبه فى حياتى 
الراوى اللى غالبا الفيلم بيبدأ ويخلص وانا مشوفتش منه غيره صوته وطلع بضهره فى مشهد فى اخر الفيلم وهو بيودع المشاهدين وحتى ابطال الفيلم بنهايه مفتوحه لخيال الكل 

بحب الدور ده !! واديت لنفسى فيه اوسكار كتير اوى 

" اوسكار احسن راوى "

الوقت : احسن ممثل بجداره 
الظروف : احسن ممثل مساعد 
الخبرات : احسن ممثله بجداره 
سيلين ديون : احسن مغنيه فى الفيلم ( وكالعاده متحيز انا جدا ) D:

وبيفضل الفيلم شغال والزحمه يتجى وتروح وسيلين بتغنى والقطر بيمشى ويجيب ناس ويسيب ناس وانا واقف بتفرج على كل ده 

هو صحيح فيلم قد يبدو بايخ الا اننا لازم كلنا ندخلو و لازم كلنا نتفرج عليه بس الجدع اللى يعرف يستمتع برخامه الفيلم ويشوف فيه حاجه مسليه 

والغريب بقى ان تركيا مافيهاش يوتيوب من 2008 قال ايه !! اصل اليوتيوب فيه فيديوهات مسيئه لمصطفى كمال اتاتورك مؤسس تركيا الحديثه 

الله يكون فى عون الاتراك انا لو ماكنهم اسيب تركيا واجى مصر , اليويتوب على قفا مين يشيل , اه والله حتى اسئلونى انا , ده انا فركت اليويتوب ده ذهابا وايابا يجى بتاع خمس ست مرات و اتعلمت منه كتير اوى ...
ورغم كرهى للنظام الاشتراكى الاقتصادى لانه بيخلق انظمه قمعيه شديده العدوانيه و طبقه من المستفيدين اللى بيمصوا دم الشعب الا اننى بحترم التجربه الصينيه فى تطبيق النظام ده هناك لكن كل المحللين بيقولو ان الصين هاتقوم فيها ثوره على المدى القريب 

وبحترم جدا الالمان والكنديين لانهم عرفوا يخترعو نظام اقتصادى محصن ضد كل الزلازل اللى بتحصل فى وول ستريت نيويورك والعجيب بقى ان اللى عملهم النظام ده مصريين , اه والنعمه وكان اعتمادهم الاساسى على النظام الاقتصادى الاسلامى اللى بيقلل الفوايد البنكيه لكن بيزود التسهيلات على القروض والمشاريع الصغيره واللى بيخلى دوره راس المال تتحرك اسرع فالعائد العام للدوله يبقى اكبر 

انا رغاى اوى D:

وعلى الرغم ان تيتو كان حرامى وقتال قتله الا انه مارضيش يرجع للقتل والاجرام لانه ببساطه عرف يلاقى نفسه فى حبه لنور " حنان ترك " وصداقته لفارس " عمرو واكد " 
وفضل انه يموت فى سبيل المبدأ والحب , وانا احترمته جدا ساعتها 
صحيح ان ساعات بحب اشوف نهايات من نوعيه 
happy ever after 
بس شريف عرفه كان ليه رأى تانى وقرر ان الفارس المحارب من اجل المبدأ وضدد قوى الشر لازم يموت ويدفع تمن نبل اخلاقه ...

وكفايا اوى كده النهارده 
نبقى نكمل بكره بقى 
شكرا على كميه الوقت المهدر فى قرايه هذا الهرى اللى مالوش معنى غير انى عيل فاضى :))

احمد الجمال  

الصوره لشارلى شابلن قائلا فى التعليق عليها " لا اخشى على نفسى شيئا اكتر من احساسى بأنى كائن مرفهه "