الأربعاء، 28 نوفمبر 2012

و انا مع نفسى قاعد




شهر !!!! شهر ماكتبتش حاجه فى المدونه ؟؟؟؟
سؤال بحاول اجاوب عليه كل يوم بعد يوم دراسى طوييييل , بحاول اجاوب بانى افتح المدونه و افضل متنح فى الصفحه البيضا و مش عارف اكتب ايه !!!!

احساس غريب لما تحس ان الكلام عمال يتنطط جواك عايز يخرج باى طريقه و انا مصر انى ماكتبش مع انى كنت هاموت و اكتب 

هى حقيقه و لازم اعترف بيها , لقد تحولت من مجرد كاتب هاوى , الى رجل الكتابه هى مهنته
لم ادرك يوما حقيقه توابع تلك المهنه , لكننى منذ شهور بدأت ادرك كم هى مهنه مرهقه
كم هى شاقه !!! 

الضغط العصبى الشنيع اللى بيجيب صداع بقى العادى بتاعى 

عمر طاهر قالى قبل كدا " لو قررت تبقى كاتب او صحفى لازم تعمل حسابك انك هتحرق 3 حاجات
اعصابك و قهوتك و سجاريك " 

يومها عملت نفسى منصت بس كنت من جوايا فاكرو بيرسمهم عليا بس لما اشتغلت فهمت ان دى الحقيقه المجرده من اى حاجه 

سلوكى تجاه معظم الناس حواليا بدء يتغير تدريجيا , ناس كتير ابتدت تحس انى بتغير عليهم و انى مابقتش احمد بتاع زمان
اصحابى لسا مش قادرين يفهموا انى دلوقتى ممكن افضل قاعد متنح لمده اربع خمس ساعات فى ورقه فاضيه و بحرق فى قهوه بس 

لسه مش عارف اقتنع انى مطلوب منى السنه دى انجح من اول مره و دى حاجه عمرى ما عملتها من يوم ما دخلت الكليه و ده عاملى ضغط عصبى بردو
انا بحاول و ربنا يستر 

صحيح انا اخدت خطوه على الطريق الصح , الطريق اللى كان نفسى امشى فيه من زمان , صحيح الخطوه جت متأخره بس انا مصدق ان كل حاجه دايما بتيجى فى وقتها 

صحيح " مصر " مش هتقدر تفهم ان اللى بينا انتهى خلاص و لهذا السبب بطلت العب سياسه بكل اشكالها  وتحولت من شخص ثورى من الطراز الاول و واحد من مصابى الثوره الى شخص حزب كنبه من الطراز الرفيع بل انى قربت اشك انى جاسوس اصلا مش مصرى 

حتى " هى " بقت تفهمنى مره صح و مرات غلط , الحق دايما مش عليها , الحق عليا لانى طول عمرى ما بعرفش اشرح كويس 

الحق مش عليها دايما , الحق على دمى التقيل و شخصيتى الرخمه فى كل اطاورها بس الموضوع خرج من ايدى خلاص , انا كدا و كدا يناسبنى جدا 

الحق مش عليها دايما , الحق على غبائى اللى مقدرش يتفهم معانى كلامها و ما وراء المعانى 

و ليكن عزائك فى انكى تحبين هذا المجنون و ان هذا المجنون يحبك و يحب حبك له 

احساس نادر لما تحس انك بتكبر , انك بتتطور , انك بتعمل حاجه , جزء من الشعور مؤلم و جزء منه لطيف انا بقى واقف فى الشعور الوسطانى بين الالم و اللطافه , 

 " الحب لا يُهزم " جابريال جارسيا ماركيز 

عبقريه الراجل ده فى شخصياتو اللى بيرسمها ببراعه منقطعه النظير , مستحيل تعدى على روايات الراجل ده من غير ما تحس بنفسك واحد من ابطالو , هو متميز اوى فى النقطه دى  
ماركيز بالنسبه ليا رسام اكتر منه روائى 

ولأنى رجل لا يمنح لقب " رسام " بالساهل , فاحب اوجه رساله للاستاذ ماركيز انه كدا دخل التاريخ " التواضع ده هو اللى مودينى فى داهيه " 

بعيدا عن كل حاجه بتحصل فى البلد و اللى بحاول بكل الطرق انى انسلخ من كل الحوادث اللى بتمر بيها مصر , الا اننى مدرك انها لحظه و هتعدى , لحظه ممكن تستمر لشهور لسنين لكنها فى النهايه لحظه 

" تعرفى يا مصر , انا بقيت بحبك كأنك مرات ابويا , لو عليا اضربك بالنار لكن بخاف على زعل ابويا " علاقتنا اتوترت اوى يا مصر , بس انتى اللى علمتى كدا فينا 

زمان كان ممكن اديكى روحى و كنت هابقى مبسوط و دلوقتى مابقتش عارف حتى اديكى ودانى و ااسمعك
فى يوم هتفهمى ان انا واللى زى حالاتى حبناكى اكتر من حد اى فى الدنيا بس انتى طول عمرك كدا , بتحبى اللى بيكرهك , 

للاسف احنا مش لبعض يا مصر , لا انا هاعرف اكرهك ولا انتى هتعرفى تحبينى و من هنا و رايح هابطل اقول " مصر هى امى " هاقول " تركيا هى امى " ايوا تركيا يا مصر 

تركيا اللى فضلت مخبيه عليا انها امى طول المده اللى فاتت دى عشان ماتجرحش مشاعيرى
انا كدا خلاص خلصت و فرغت شحنه الكتابه اللى كانت جوايا 

و الشتا وصل بالسلامه الحمد لله بعد طول انتظار 

و اختى لسا بتشرب النسكافيه بتاعى و تقولى ما شربتش حاجه . و النسكافيه بيخلص لوحدو و اللذيذ انى لسا بصدقها 


الى كل الماره فوق تلك الحروف , اسف على الصداع 

احمد الجمال 
مطلع شتاء 2012

هناك 7 تعليقات:

  1. :)
    بطلت اكتب وبطلت احط كومنتات وبطلت اصلا اقرأ البوستات كاملة

    بس مش مشكلة اعتبره استثناء :)

    عادي لما تفضل 5 ساعات تتحايل على كلمة تطلع .. ولو مطلعتش عادي برده تقعد 5 ساعات تانيين
    بس بلاااش تستسلم
    علشان انا عملت كده
    وف الاخر مبقاش عندي كلام .. والكلام الكتير اللي جوايا بقى مجرد شيء داخلي مبيطلعش ولا لنفسي
    ولا بقيت بعرف اترجم قلبي ف عقلي !

    انا كمان بطلت سياسة :)
    بقيت بأيد او بعارض جوايا وخلاص
    وساعات بفضل اني متعبش نفسي ف التفكير مين صح ومين غلط

    لا مش مصر هي اللي عملت كده فينا
    للاسف احنا اللي عملنا كده فيها وفينا !

    شكل القهوة عملت مفعولها :)

    تحياتي ليك

    ردحذف
  2. و انا موقعى هذا بحترم جدا خروجك عن صمتك وتعليقك على بوستى المتواضع
    وبعدين مين قال انك استسلمتى ؟؟!!! انتى بس بتاخدى هدمه والدليل انك قريتى البوست وعلقتى حتى لو على سبيل الاستثناء
    صدقينى ارجعى اكتبى تانى , الكتابه رغم كل المها الا انها العلاج الانجح لكل امراضنا
    تحياتى ليكى بردو :)

    ردحذف
  3. اول جزء ده اصلا انا كنت تقريبا داخلة اكتبه عندي ... معرهفش ايه موضوع عند الكتابة ده
    كلام كتير جدا بيبقى جوايا ونفسي اطلعه وبرضه بقف قدام الصفحة البيضة واتنح .. انا فاكرة اخر مرتين كتبتهم عند في الكتابة نفسها

    اما بالنسبة لمصر فلنا الله

    تحياتي ليك وللقهوة والنيسكافيه وادعيلي اكتب قريب :))

    ردحذف
  4. لازم تكتبى يا نور !! اللى زينا مالهومش غير الكتابه , الموضوع بقى اكبر من اننا نمارس حريتنا فى اننا نختار نكتب او لا !!!!
    الموضوع بقى لا ارادى :)
    الجموع الغفيره بتطلب منك ترجعى تكتبى فى اسرع وقت ممكن :)
    نورتينى :)

    ردحذف
  5. بوست مرح ممتع جذاب !!

    "
    احساس نادر لما تحس انك بتكبر , انك بتتطور , انك بتعمل حاجه , جزء من الشعور مؤلم و جزء منه لطيف انا بقى واقف فى الشعور الوسطانى بين الالم و اللطافه
    "

    مش عارفة المرة الكام اللي بقرا فيها البوست ومش عارفة ليه بقف كل مرة عند نفس ذات الجملة ومش عارفة ليه بعلق ،شكله فراغ :)

    ردحذف
  6. و الشتا وصل بالسلامه الحمد لله بعد طول انتظار

    و اختى لسا بتشرب النسكافيه بتاعى و تقولى ما شربتش حاجه . و النسكافيه بيخلص لوحدو و اللذيذ انى لسا بصدقها , وكل سنة وانتو طيبين "دى بقى من عندى" :)

    اسف جداً على التعبير الركيك دة وسط الجو الادبى الرائع دة بس الى عاوز اقولو لابو خالد ان الجملتين دول "عجبونى ف...خ وتقريبا مت من الضحك وكتبت الجملتين دول وانا بموت وشكراً :D

    ردحذف