العوده الى الزفت

من ارخم الفترات اللى بتعدى عليا كل سنه 
دخول المدارس والجامعات 
فتره بتمنى انها تتمسح من السنه بأستيكه من كتر ما انا بكرهها 
عمرى ماكنت بحب المدرسه , كنت بقوم كل يوم بضرب الجزمه مع انى بصحى بدرى بس فى الاجازه بس انما فى الدراسه ببقى نفسى اصحى العصر كل يوم عشان اليوم الدراسى يفوتنى و اغيب 

يمكن لسه مش عارف اوصل للسبب فى كرهى الغريب للدراسه على الرغم من انى المفروض طالب دحيح من الللى دخلو هندسه بمجموع كبير فى ثانويه عامه 

حتى فى الكليه بتبقى اسعد فترات حياتى لما انزل الكليه بس اعمل اى حاجه غير انى احضر السكاشن والمحاضرات 

السينما ليها طعم تانى لما تنفض للمحاضره التانيه و تنزل على السينما 
وبعد السينما تخبط اتنين فول من عند جاد , يااااااااااه الدنيا و ما فيها 

الاجمل بقى اننا بنبقى فى الشتا فالشوارع بتاعت وسط البلد بيبقى ليها طعم تانى مختلف عن طعم الصيف الخنيق وفى اخر اليوم اللى المفروض انه يوم دراسى تنزل على كليتك تمضى انصراف و تصور المحاضرات الللى هما خدوها وبعدين تروح منتعش 

منتهى الاحساس بالسعاده و الفشل فى آن واحد 

المهم بقى اننا راجعين الدراسه بعد بكره و ده عاملى دوشه فى دماغى لعده اسباب 

اهمها اننا لسه فى الصيف و ان السينما مافيهاش افلام حلوه و ان الفيلم بتاع كيرا ناتلى لسه مش عارف هاينزل امتى و ان السنه دى مخصوص فى ناس هاتتدحل و بقوه عشان تمنع المهزله اللى كانت بتحصل كل سنه دى 

غير هذا و ذاك انى من جوايا عايز اخلص الكليه بقى , خلاص زهقت منها اصلى بقالى كتير اوى فيها , كبير انا على المرمطه دى اصلا بس اعمل ايه ؟ 

المهم انى بردو بكره اليومين دول اللى المكتبات بتتزحم فيهم زحمه غريبه لدرجه انى بفكر افتح مكتبه الكام يوم دول وبعدين اقفلها تانى 

و اللى يشوف الواد من دول وهو خارب بيت ابوه كراريس وكشاكيل يقول ان الواد هايطلع الاول على الجمهوريه وفى الاخر بيدخل تجاره انتساب اسيوط 

يمكن الغلط فى المنظومه الغبيه اللى بتخلى الشاب من دول يقضى اكتر من تلت عمره داخل اسوار المدارس والجامعات على فرض ان متوسط عمر الانسان 70 سنه 

انهى منطق يقول الخرافات دى ؟؟؟ وياريت بعد كل ده هاتخرج تشتغل بشهادتك او هاتشتغل حاجه بتحبها 
ابقى قابلنى , هاتخرج تلاقى مثل متخلف بردو بيقولك اشتغل اى حاجه على ماتفرج وابقى اشتغل اللى تحبو لما تاخد خبره 
وتفضل طول عمرك تشتغل حمار فى ساقيه على ماتفرج و بالطبع لو فكرت تتجوز ده هايبقى من دروب الكفر 
ضيق الحال من ناحيه و ضغط اهل العروسه من ناحيه تانيه لحد ماتخرج عن شعورك و تروح تنتحر و اعتقد انى سمعت عن رقم محترم من الانتحارات فى مصر نتيجه احساس بالعجز قصاد كل حاجه 

هى قلبت غم كدا ليه ؟؟ 

ماعلينا المهم انى هحاول استمتع بالكليه السنه دى و ابقى طالب مجتهد وانجح بمواد بس , مش لازم يعنى اعيد السنه و اهو كلو زكاه عن صحتى D:

لسه واخد بالى امبارح بس انى بحب فيلم السلم والتعبان اوى بحسه فيلم فلسفى اوى رغم انى مابحبش مياصه هانى سلامه بس بلاقينى مضطر استحمله عشان فكره الفيلم عاجبانى و الاهم من كدا انى بقيت اعرف ان طارق العريان هو المخرج من قبل ما اشوف التتر , من كتر كميه الاعلانات اللى بيحشى بيها افلامه , ده حتى كليبات اصاله مؤخرا بقت كلها اعلانات , مش ليه بحسه كان نفسه يطلع مخرج اعلانات بس فشل وطلع مخرج افلام D:

وبس خلاص 

الصوره اللى فوق دى هى االايموشن الرسمى بتاعى فى صباح كل يوم دراسى لعين 

من غير مناسبه

من غير مناسبه قررت اكتب هنا على طول من غير ما اكتب فى ملف ورد وبعدين انقل الكلام هنا والحقيقه انى مش عارف السبب فى كدا ايه ؟!

من غير مناسبه حبيت اعترف انى ماهما حاولت اكون اجتماعى هافشل فقررت اتماشى مع الامر واعترف انى مش اجتماعى الا فى حالات الضروره القسوى اللى هى الشغل فقط 

من غير مناسبه حبيت اقول لكل بنى ادم او بنى ادمه فى حياتهم حب يحافظوا عليه , مش بالضروره حاله الحب المتعارف عليها بين ولد وبنت 

وانما حاله الحب الكبير حب العيله بافرادها كلهم اللى احيانا بنحس بتسلطهم المبالغ فيه وحشريتهم الزياده فى حياتنا الخاصه وحتى اضيق مساحات خصوصيتنا بيقتحموها بمنتهى العنف بدافع الحب والخوف ولازم نقدر خوفهم علينا 

حاله الحب بين الاصحاب اللى المفروض انهم بيحبوا بعض بدون مقابل و بردو رغم حالات الخناق والقفش الكتير اللى بتحصل بين الاصحاب واللى غالبا بتكون بسبب اختلاف فى وجهات النظر والتمسك بالدفاع عن تلك الوجهه بعنفوان شبابى

ايه اللى انا بقوله ده ؟؟؟ مش عارف ليه قررت اقول كدا او لمين بوجه الكلمات دى بس اهى شحنه وكان لازم تخرج فى اى حد وخلاص 

بس بردو مازلت مصر على وجهة نظرى بان واجب على كل حد بيحب ياخد بالو من الناس اللى بيحبهم اوى , لانى ببساطه اكتشفت ان الحب هو اصل الاشياء , كل الاشياء مهما اختلف منبعها ومهما اختلفت طريقه نهايتها فى هاتببدأ بالحب 

و رغم اننا فى مجتمع بيقبل الحب بس على مزاجو , يعنى بيقبل الحب على طريقه التقاليد , وايه هى التقاليد ؟؟؟
مش عارف , بس غالبا هى شويه قواعد حطها شويه اشخاص فى زمن بعيد اوى عن الزمن اللى احنا عايشين فيه ده ومش عارف ايه ظروفهم ساعتها اللى دفعتهم لوضع تلك القواعد الا انهم حطوها والزمونا بيها بالتدريج لحد ما بقت قانون لا يقبل النقاش 
او مجرد النقاش فيه حيود و فجور و خروج عن المألوف والمعروف و المعتاد ,

عانت العقول العربيه كثيرا من تلك الازدواجيه فى التفكير اللى تقود معظمنا الى طرق لا تنتهى من التفكير و التفكير فى حلول لهذا المأزق الذى لا بد من الخروج منه الى عالم جديد لا يضع عوائق امام الفكر او يرصد اشخاص لامهنه لهم الا شرطيو افكار 

لقد عجزوا عن الحب فتمحور العجز عن الحب الى مقدره رهيبه الى دفع اى محاوله لتجديد هذا الحب وبالتدريج اصبحوا لا يطاقون ولما احسوا بمرضهم قرروا ان يفشوا هذا المرض فى باقى المجتمع حتى لا يشعروا بالغربه 

فخرج لنا جيل من الاباء والاجداد يأخذون من امثال عقيمه ك" ابعد عن الشر وغنيلوا وامشى جنب الحيط " نبراسا لطريقه تفكير وتربيه لابنأهم 

وبعدين طيب ؟؟؟ انا عايز حد يقولى اسكت 
طيب ايه اللى يمنعنى من انى ادوس على علامه الغلط اللذيذه اللى فى اول الصفحه فوق من على اليمين ؟؟؟ 
مش عارف بس هى رغبه فى حاجه انا مش عارفها 
رغبه وخلاص , رغبه مجهوله مخلاينى مكمل عشان اكتب النحكشه دى وبدون مبرر 

وبعدين تليفونى بقى بيرن كتير اوى بارقام غريبه و كل اما ارد ماحدش يرد عليا 
ويكأننى بتزاول !!! 
انا غلطان اصلا انى رديت !! بس المشكله انها احيانا بتطلع حاجات مهمه فعلا 
ماعلينا !! مش مشكلتكو دى اصلا 

سر جديد وفظيع اكتشفته مؤخرا ان كل العيال الصغيره بيعشقوا الشاى باللبن 
ايه السر فى كده ؟ مش عارف بردو 
انا ملاحظ انى بقيت بقول مش عارف كتييييييييييير اوى اليومين دول و ده مؤشر كويس ان مستوى معارفى بدء يرتفع لتحت !!! 

و اكتشفت ان الكلب بتاعى وحشنى اوى , انا عارف انه فى مكان ما عايش حياته كما ينبغى واكيد زمانه اتعرف على كلبه لطيفه بيقضى معاها وقتو وغالبا هاتكون جابتلو الذريه الصالحه , عارفك سيس و زمانك هتسميهم اسامى غير اللى كنا متفقين عليها بس هاعذرك عشان زمان المدام شخصيتها قويه وهى اللى اختارت الاسامى 

كفايه كدا رغى بقى 

(^_^)
 

بوست فاضى خالص

لو لم يكن الحديث فى استطاعتك فدع الصور تتحدث فهى تعرف كيف تقول الحقيقه 

اكتشفت النهارده اننا بناخد قرارات كتير فى حياتنا بس مش بنعملها عشان بناخدها فى وقت غلط او يمكن بناخدها باحساس غلط او مش هو الاحساس المطلوب 

اكتشفت ان القرار الحقيقى اللى بناخد من بعده خطوه بجد بيقى قرار هادى جدا بتاخده وانت هادى مش وانت مبسوط اوى ومش وانت زعلان اوى 

حاله من السلام الداخلى بتخليك القرار يعدى على مخك لمده ثانيه بعدها بتلاقى نفسك ضحكت وقولت جوه نفسك " انا هاعمل كذا " 

بس خلاص 

شكرا اصاله :)) 

ساعدتنى كتير اوى انى اخد القرار الصح او الاصح فى حياتى على الاطلاق 

" يادوب حلمى أنا أنى اشوف الضحكه فى عنيكى " .

الجمله دى اصاله لخصت بيها المحتوى الحرفى لحياتى .

انا حبك , اصاله 2012 

http://www.youtube.com/watch?v=Qdj_0hJLoXo 


 enjoy it as much as you can 


 

 

انا معترف

خلينى اعترف بقى ان موود الكتابه مش بيجى بالسهل 
لازم تطلع عين اهلى عشان اعرف اكتب سطر محترم ينفع يتقرى 
بس عشان اكون واقعى بردو فى شويه حاجات كده بتحطنى فى الموود لو كان توقيتها صح 

العنصر الاول والاكثر اهميه !!! انى اكون قريت روايه جامده فشخ تخلينى عمال اتشقلب جوه دماغى و بعد " سبتمبر و رغم الفراق " انا مادخلتش فى الموود ده خالص 

بالعكس فى روايات تقراها تحس انك نفسك ترجع جاهل ومبتعرفش تكتب او تقرا من كتر ما هى مبتذله وسخيفه و تسد النفس D: 

بس الكيف سلطان و بيزل يعنى !!! D: 

الحاجه التانيه و هى مهمه بردو  انك تحس المزيكا هى اللى بتسمعك مش انت اللى بتسمعها و دى حاجه مهمه جدا بالنسبه ليا !!! 

يعنى لو حسيت انى انا اللى بكلم المزيكا هتلاقينى بكتب حلو اوى 

و مؤخا طلع اختراع عجيب كده اسمه ask.fm
البتاع على قد ماهو فضوحى وبيقول بلاوى الا انه عرف يدخلنى فى الموود لانى ببساطه اكتشفت ان الناس بتجاوب بصراحه لو ماكنتش عارفه مين بيسألها 

فكره ان تحكى لحد غريب انت متعرفوش شكلها طلعت بتريح جامد 

المهم انى فضلت اتشقلب عند العيال اصحابى و اصحاب اصحابى , ولقيتنى مهتم اوى بحياه ناس معرفهومش 

الحاله دى خلتنى عايز اكتب عن الناس , بيحسوا ايه ؟!! بيبحوا مين ؟؟ بيكرهوا مين ؟؟ بيخافوا من ايه ؟؟ نفسهم فى ايه ؟؟!!! 

ولاقيت نفسى عمال اسال الناس ومش جايلى قلب اعمل اكونت واسيب الناس تسئلنى عشان انا عارف انى رخم وممل و ردودى سخيفه شبهى وفضلت كدا لحد ما عيل منا اصحابى قفشنى وعرف ان انا اللى بسئل 

وقالى طب ماتعمل اكونت وتورينا شجاعتك !!! فضلت اسوف فيه طبعا لحد ما بقينا بعد الفجر و الرجل بقت خفيفه على النت وبعدين عملت اكونت D:ناصح انا D:

و اكتشفت وانا بعمل كدا , حاجه خطيره جدا فى شخصيتى 
ما بحبش حد يسالنى او يمكن مش متعود عشان متعود انا اللى بسأل بحكم الشغل والعاده و كل حاجه , انا اللى بسأل دايما 

لكنى قررت اعترف بالنقطه دى فى شخصيتى عشان اعريها تمام على امل انها تختفى او تتحسن فى شخصيتى و مابقاش ممل D: و ده احتمال صعب !!!:))

المهم بقى , داهون الاكونت بتاعى 
واللى عايز يسأل , يتفضل يسأل و امرى لله :)

http://ask.fm/AhmedElgammal

و كل سنه وانتو طيبين :))
 

زحمه فكريه

زحمه فكريه و اختناق فى حركه المرور داخل عقلى والاشارات المروريه كلها عطلانه والناس بتعدى الطريق مع العربيات فى نفس الوقت والموتوسيكلات بتمشى على خطوط عبور المشاه و الحاله صعبه جدا فى الطريق المؤديه الى عقلى و الموقف سيزداد سوءا مع اقتراب ساعات الذروه المروريه !!! 
وفى وسط الزحمه دى كلها بتلطع سيلين ديون بجمله بتخلينى اقف كتير وافكر 

where is my heart beat now??? where is the sound ??that only echoes through the night 

بصراحه انا ماعرفتش ارد عليها اقولها !! هى دايما كده بتسالنى اسئله صعبه والغريب ان الاغنيه دى قديمه بشكل مش طبيعى دى من سنه 90 و من بدايات سيلين ديون الحقيقيه وبردو مش عارف ايع اللى فكرنى بالاغنيه دى ؟ يمكن هو نصيب افتكرها عشان الاقى السؤال ده و اكتشف انى ما بعرفش اجاوب على سيلين 

 وبعد الدربكه دى كلها , الحمد لله الزحمه اختفت و كانت الاجابه بردو فى صوت سيلين و منظر القطر وهو بيتحرك على القضبان من غير ما يبص يشوف مين وقع منه او مين مالحقوش , هو ماشى بمبدأ واحد لو انت عايزنى يبقى هاتستنانى وتركب معايا !! ولو انت مش عايزنى ممكن تنزل فى اى محطه و انا مش هامسك فيك !!!

متصالح مع نفسه اوى القطر !!! عشان كده كل الناس بتحترمه وتحترم مواعيد واللى مش بيحترمه هو كمان مش بيحترمه وبيمشى من غيره !! 

لما سمعت سيلين و شوفت القطر وسمعته وهو بيطحن المسافات تحت العجل بتاعه عرفت ان لكل حاجه نهايه !! كل حاجه بتخلص !! الزعل بيخلص والفرح بردو بيخلص وكل واحد فيهم بيسيب علامه فينا 

الحزن بيسيب اثار دموع نشفت على وشوشنا وحواجب مقفوله 
والفرح بيسب بقايا ابتسامه وعيون بتلمع 

وانا فين من كل ده ؟؟ انا الراوى , انا دايما الراوى و ده احسن دور بعرف العبه فى حياتى 
الراوى اللى غالبا الفيلم بيبدأ ويخلص وانا مشوفتش منه غيره صوته وطلع بضهره فى مشهد فى اخر الفيلم وهو بيودع المشاهدين وحتى ابطال الفيلم بنهايه مفتوحه لخيال الكل 

بحب الدور ده !! واديت لنفسى فيه اوسكار كتير اوى 

" اوسكار احسن راوى "

الوقت : احسن ممثل بجداره 
الظروف : احسن ممثل مساعد 
الخبرات : احسن ممثله بجداره 
سيلين ديون : احسن مغنيه فى الفيلم ( وكالعاده متحيز انا جدا ) D:

وبيفضل الفيلم شغال والزحمه يتجى وتروح وسيلين بتغنى والقطر بيمشى ويجيب ناس ويسيب ناس وانا واقف بتفرج على كل ده 

هو صحيح فيلم قد يبدو بايخ الا اننا لازم كلنا ندخلو و لازم كلنا نتفرج عليه بس الجدع اللى يعرف يستمتع برخامه الفيلم ويشوف فيه حاجه مسليه 

والغريب بقى ان تركيا مافيهاش يوتيوب من 2008 قال ايه !! اصل اليوتيوب فيه فيديوهات مسيئه لمصطفى كمال اتاتورك مؤسس تركيا الحديثه 

الله يكون فى عون الاتراك انا لو ماكنهم اسيب تركيا واجى مصر , اليويتوب على قفا مين يشيل , اه والله حتى اسئلونى انا , ده انا فركت اليويتوب ده ذهابا وايابا يجى بتاع خمس ست مرات و اتعلمت منه كتير اوى ...
ورغم كرهى للنظام الاشتراكى الاقتصادى لانه بيخلق انظمه قمعيه شديده العدوانيه و طبقه من المستفيدين اللى بيمصوا دم الشعب الا اننى بحترم التجربه الصينيه فى تطبيق النظام ده هناك لكن كل المحللين بيقولو ان الصين هاتقوم فيها ثوره على المدى القريب 

وبحترم جدا الالمان والكنديين لانهم عرفوا يخترعو نظام اقتصادى محصن ضد كل الزلازل اللى بتحصل فى وول ستريت نيويورك والعجيب بقى ان اللى عملهم النظام ده مصريين , اه والنعمه وكان اعتمادهم الاساسى على النظام الاقتصادى الاسلامى اللى بيقلل الفوايد البنكيه لكن بيزود التسهيلات على القروض والمشاريع الصغيره واللى بيخلى دوره راس المال تتحرك اسرع فالعائد العام للدوله يبقى اكبر 

انا رغاى اوى D:

وعلى الرغم ان تيتو كان حرامى وقتال قتله الا انه مارضيش يرجع للقتل والاجرام لانه ببساطه عرف يلاقى نفسه فى حبه لنور " حنان ترك " وصداقته لفارس " عمرو واكد " 
وفضل انه يموت فى سبيل المبدأ والحب , وانا احترمته جدا ساعتها 
صحيح ان ساعات بحب اشوف نهايات من نوعيه 
happy ever after 
بس شريف عرفه كان ليه رأى تانى وقرر ان الفارس المحارب من اجل المبدأ وضدد قوى الشر لازم يموت ويدفع تمن نبل اخلاقه ...

وكفايا اوى كده النهارده 
نبقى نكمل بكره بقى 
شكرا على كميه الوقت المهدر فى قرايه هذا الهرى اللى مالوش معنى غير انى عيل فاضى :))

احمد الجمال  

الصوره لشارلى شابلن قائلا فى التعليق عليها " لا اخشى على نفسى شيئا اكتر من احساسى بأنى كائن مرفهه "
 

isabel

isabel

 

هى المفروض انها اغنيه !!! لحن وكلمات وتوزيع وشويه اداء 

لكن الحقيقه بالنسبه ليا هى غير كده خالص 

isabel هى نوع من انواع الانفراد بالروح ,هى كرسى الاعتراف بتاعى , الاغنيه حافظه كل دهاليزى بتعرف تدخلى فى كل حالاتى !!! 

بتعرف تخلينى اعترف !! اعترف بايه ؟؟ مش عارف , بس ممكن اعترف باى حاجه وانا بسمعها لذلك بتجنب سماعها فى الاماكن العامه او و انا قاعد مع حد عشان ماتحصلش كوراث !!! D: 

isabel هى حدوته بيغنيها فريق il divo  .. اداء الفريق كان اكتر من رائع , خلونى احس ان ايزابيل هى حبيبه كل واحد فيهم لوحدو وفى نفس الوقت هى حبيبتهم هما الاربعه 

isabel ليها طقوس عشان تتسمع , يعنى مش فى اى وقت ومش فى حاله مزاجيه , يعنى لازم تبقى الدنيا ضلمه , مش قصدى ضلمه اضاءه وانما تبقى الدنيا ضلمه فى عقلى 

لما بحس انى جوايا حاجات كتير و لازم اعترف بمنتهى الصدق ومن غير ما اكذب على نفسى فى حرف واحد وهذا لايمنع ان الدنيا بردو لازم تبقى ضلمه بعض الشئ يعنى مايبقاش فى نور غير نور الشاشه بس 

لازم وانا بسمعها اكوب بشرب حاجه سخنه و افضل اتفرج على الدخان وهو خارج من المج و الاضاءه اللى جايه من الشاشه بترسم مع الدخان لوحه بتخلينى اسرح كتير ادامها 

Volar
Caer
Al fondo el dolor
Sonar
Perder

Imperios de ilusion

Hoy no tengo nada
Si no estas
Mi corazon se apaga

افتتاحيه الاغنيه بتاخدنى فى عالم تانى يمكن كمان الاسبانى مديها طعم تانى , طعم هذا لبحب الغجرى المفعم بمشاعر لا تعرف الزيف 

ودى ترجمه الكلمتين اللى فوق 

To fly
To fall
To the bottom of pain
To dream
To lose
Empires made of illusion
Today I have nothing
If you're not here
my heart shuts down

http://lyricstranslate.com

http://lyricstranslate.com  

 

 

http://lyricstranslate.com

http://lyricstranslate.com

 رربنا يخليك يا جوجل :)) 

المهم ان انا صنفت الاغنيه ده على انها واحده من افضل ما انتجت العقول البشريه الموسيقيه , لانها بمنتهى البساطه ممكن تتسمع مليون مره بعض ومش هاتحس انها ممله او غريبه عنك , هاتحس بعد فتره انك بدأت تحب ايزابيل انت كمان , بعد شويه هاتبدأ تتخيل ايزابيل دى شكلها ايه , وبعد شويه كمان هاترسم لها صوره لاحلى بنت فى خيالك , وبعد شويه كمان ممكن تعزف عن كل النساء الا اللى اسمها ايزابيل بعد شويه هاتكتشف الحقيقه المطلقه فى انك بقيت متوحد مع ايزابيل 

اعتقد ان الحاله دى بتتكرر مع كل واحد فينا بس مع الاختلافات الايزابيلات طبعا 

انا بحب ايزابيل وهذا يكفى الان :))

 http://www.youtube.com/watch?v=9Y-xtZkY9Io

enjoy isabel

فى العادى

فى العادى مش بحب اكتب فى المدونة بحب اسيبها توحشنى وبعدين ارجعلها , عشان لما ارجع الاقى حاجة اكتبها و تكون على مستوى الحدث

بس الموضوع السنة دى مختلف او بالاحرى الشهر دة مختلف , شهر 8 هو شهرى المفضل , مش عشان اى حاجة بس عشان انا اتولدت فيه و ده فى حد ذاتة شئ عظيم فظيع فشيخ ( مغرور اوى انا ) 

المهم ان انا عيد ميلادى كمان كام يوم وللأمانة الادبية انا مستنى مفاجأه صاحبها بيقول انها هتخلينى متفاجئ ومبسوط و انا مستنى الموضوع دة بفارغ الصبر لانى بقالى كتير اوى ما اتفاجئتش 

عارف كدة احساس اللى هو بتلاقى كل حاجة واقفه فى صفك وبتقولك يالا اتحرك و اعمل كل حاجة نفسك فيها و خد خطوه فى كل احلامك ؟ 
 عارف احساس انك تحس ان احلامك كلها قريبه لدرجة انك لو مديت ايدك قدامك هاتمسكها كلها 
عارف احساس انك حاسس ان الدنيا على طول منوره و الجو على طول حلو و المزيكا اللى انت بتحبها مش بتتقطع من ودنك ليل ونهار 

عارف احساس اللى بيجيلك لما تحس انك امير هذا الكوكب و انك ماشى لوحدك فى الشارع رغم انه مليان بشر , مش تعالى ولا غرور لكنه احساس بأنك حد مختلف 

عارف احساس العيل الصغير لما يفضل يعيط كتير اوى وفجأه مره واحد يسكت لمجرد انه شاف امه بتضحك وفى ثانيه واحده هتلاقيه بيضحك معاها رغم انه كان مفطور من العياط من ثانيتين ؟

عارف بقى لما تجيب كل الاحاسيس دى وتضربها فى الخلاط و بعدين تحطها فى المج بتاعك اللى انت بتحب تشرب فيه كل حاجة ؟

اهو دة انا دلوقتى !! الحمد لله ان الناس اللى بتسبب الاحساسيس دى ليا موجودين فى حياتى 

و الحمد لله ان فى حد خد باله ان عمرو سلامه المخرج هو هو عمرو سلامه اللى كتب كتاب شاب كشك D:

طيب حيث كدة بقى !!! كل سنه وانتوا طيبين بمناسبه عيد ميلادى وكل سنه وانا طيب بمناسبه عيد ميلادى بردو و مش عارف ليه السنة دى سيلين ديون مانزلتش البوم قبل عيد ميلادى ؟؟ :)) 

كان معكم احمد الجمال فى واحده من لحظات خام السعاده 

صيف 2012